Dosja e SPAK/ Jo vetëm Ahmetaj, edhe Gjiknuri përfitoi nga Zoto

Të tjera detaje zbardhen nga dosja e SPAK lidhur me inceneratorët.

Referuar detajeve të reja përveç ish-zv.Kryeministrit Arben Ahmetaj, pagesa për udhëtime nga Klodian Zoto janë bërë edhe për Sekretarin e Përgjithshëm të PS, Damian Gjiknurin, ish-ministër i Energjitikës.

Sipas News24, Zoto ka rezervuar hotelin për Gjiknurin duke gjeneruar 1500 euro.

Sipas dosjes së SPAK, në udhëtimet e Ahmetajt në Rumani kanë shkuar edhe Mirel Mërtiri dhe Gjiknuri.

Sipas dosjes, hoteli në Rumani është rezervuar në emër të Damian Gjiknurit. Gjithashtu është rezervuar edhe hoteli në Vjenë, ku ata kanë qëndruar në Radisson Blu Style.

“Nga të dhënat e TIMS rezulton se më datë 15 prill 2014 Arben Ahmetaj del nga Shqipëria në ora 14.36 me linjën Austrian. Po më datë 15 prill 2014 rezulton se shtetasi Mirel Mërtiri del nga Shqipëria në porën 15.35 me të njëjtën linjë ajrore dhe se gjithashtu edhe shtetasi Damian Gjiknuri ka dalë po në këtë datë me të njëjtën linjë ajrore në orën 14.05.

Ndërkohë në lidhje me kthimin konstatohet se më datë 17 prill 2014 në ora 11.18 dhe 11.19 shtetasit Mirel Mërtiri dhe Arben Ahmetaj kthehen bashkë me linjën e fluturimin Lufthansa.

Ndërkohë që Damian Gjiknuri kthehet një ditë më vonë”, thuhet në dosjen e SPAK.

Referuar dosjes së SPAK, Zoto ka rezervuar hotelin në emër të Damian Gjiknurit.

“Në emailin e shtetasit Klodian Zoto më datë 12 mars 2014 rezulton se i është dërguar email nga booking.com për prenotimin e tij në Radisson blu sky hotel Vienna ku i konfirmohet rezervimi me nr… në adresë…. me guest name Damian Gjiknuri me periudhën 12.3.2014 deri në 13.3.2014.”, sqarohet në dosje.

Nga kqyrja e të dhënave të veprimeve të kartave dhe llogarive në emër të Klodian Zoto të vëna në dispozicion nga IS Bank rezulton se me kartën nr… janë kryer veprimet si më poshtë:

Në datë 12 mars 2014 është kryer veprimi më kartë për realizimin e transaksioneve në tregtarin “Style Hotel Vienna” në shumën 385 euro.
Në datë 13 mars 2014 është kryer veprimi më kartë për realizimin e transaksioneve në tregtarin “Style Hotel Vienna” në shumën 231 euro.
Në datë 13 mars 2014 është kryer veprimi më kartë për realizimin e transaksioneve në tregtarin “Style Hotel Vienna” në shumën 256 euro.
Në datë 12 mars 2014 është kryer veprimi më kartë për realizimin e transaksioneve në tregtarin “Style Hotel Vienna” në shumën 565 euro.