Pas Shqipërisë, edhe Agjencia e Ushqimit dhe Veterinarisë së Kosovës, ka dhënë urdhër që të tërhiqen nga tregu të gjitha produktet e markës “Wudy”.
Ky institucion i bën thirrje qytetarëve që të kenë kujdes dhe të mos ti konsumojnë, për shkak se dyshohet se kanë një lloj bakteri.
Më 21 shtator edhe Autoriteti Kombëtar i Ushqimit në Shqipëri, ka njoftuar qytetarët që mos të konsumojnë produktet e kësaj marke, për shkak që, siç është thënë, ato “paraqesin rrezik me ndikim serioz për shëndetin e njeriut”.
“AUV menjëherë pas marrjes së informatës nga media se në produktet e prodhuesit AIA brendi ‘Ëudy’, vendi i origjinës Itali, dyshohet për prani të bakterit Listeria në disa llote prodhimi, ka filluar gjurmimin për identifikimin e të gjitha llojeve të produktit të importuar në Kosovë nga ky prodhues”, thuhet në përgjigjen e AUV-it dërguar Radios Evropa e Lirë.
Nëse ushqimet e kontaminuara me bakterin Listeria konsumohen, atëherë shkaktohen simptoma sikurse vjellja, diarreja, temperaturë, ethe e dhimbje muskujsh.
Ndërkaq, nga të dhënat e kontrollit kufitar dhe të dhënat e siguruara nga importuesi-distributori për Kosovë, është gjetur se disa nga këto produkte të markës “Wudy”, gjenden edhe në Kosovë.
Agjencia e Ushqimit dhe Veterinarisë tha se urdhri për tërheqje të tërësishme të gjitha produkteve nga ky brend vlen deri në një vendim tjetër.
Discussion about this post