Ish-kryeministri i Britanisë së Madhe Boris Johnson ka bërë një krahasim mjaft të goditur. Sipas tij, presidenti i Rusisë Vladimir Putin po vepron si ish-lideri i Serbisë, njëherësh i akuzuar për krime lufte, Sllobodan Millosheviçin.
Sipas tij, Putin ka bërë një gabim katastrofik, kur vendosi të sulmojë Ukrainën.
“Të gjithë ne në qeverinë britanike kemi lexuar esenë e tij për Ukrainën, që e publikoi verën e kaluar. Ai në mënyrë thelbësore e vlerësoi gabimisht Ukrainën. Ishte sikur të lexonit për Sllobodan Millosheviçin që fliste për Kosovën”, shtoi Johnson.
“Millosheviçi mendonte që Kosova është pjesë përbërëse e Serbisë së madhe dhe atdheu shpirtëror i kombit serb. Mendoj që Putini mendon njëjtë për Kievin dhe origjinën e besimit ortodoks”, theksoi ish-kryeministri britanik.
“Është një gabim total. Ukrainë është një kulturë evropiane e lirë dhe e pavarur me identitetin e saj, me ambiciet dhe fatin e saj. Ai bëri një gabim thelbësor”, tha për fund Johnson.
Discussion about this post