Pedagogia dhe studiuesja Jonila Godole ka folur për herë të parë pas marrjes së postit si drejtuese e Sekretariatit për të Përndjekurit Politikë në Partinë Demokratike.
Në një intervistë për News24, Godole u shpreh se vendosi që këtë angazhim ta bëjë në PD, pasi sipas saj, me gjithë gabimet që mund të ketë kjo parti, është e vetmja që ka ngritur zërin për krimet e komunizmit.
“Më pyetën nëse mund ta shihja veten time aty, që të vazhdoj rolin që kam pasur në këtë temë, zbardhjen e krimeve të komunizmit, kështu që për mua është një angazhim vullnetar. Thjesht ata e kërkuan mbase një këshillë prej meje, se si mund ta trajtojnë këtë temë mjaft delikate dhe me përgjegjësi. Unë kam folur se çfarë mund të ishte bërë më mirë në këtë drejtim. Kam qenë shpesh mjaft kritike. Nuk e di nëse është një person i vetëm që më ka zgjedhur, besoj se do të ketë pasur një këshillim në lidershipin e PD.
Nuk do më dukej e logjikshme të më kërkonte mua mendim PS, kur nuk ka pasur asnjëherë interes për këtë kauzë. PD, me gjithë gabimet që mund të ketë bërë, ka ish të përndjekur politikë si trupin më të fortë të votuesve, ndaj m’u duk normale që ata të vinin tek unë dhe jo PS. Unë kam qenë e goditur, e anatemuar nga PS në këtë fushë. Unë do të kem mundësi, me grupin e punës, me të rinj që do më bashkohen, me ish të përndjekur politikë në gjithë Shqipërinë, si të ngre një strukturë. Me gjithë mbështetjen e tyre do shohim si të ndikojmë te grupi parlamentar i PD, që kjo kauzë të ngrihet në Parlament”.
Godole u shpreh ndër tjera, se ky është një angazhimin vullnetar, ndërsa do vazhdojë me drejtimin e Institutin për Demokraci, Media dhe Kulturë.
“Ky është një angazhim vullnetar. Ky ka qenë një kusht i rëndësishëm për mua, që ky është angazhim vullnetar. Unë jam pedagoge në UT, do vazhdoj të drejtojë Institutin për Demokraci, Media dhe Kulturë, dhe ky është angazhim vullnetar. Unë nuk jam e punësuar, s’kam zyrë timen, prandaj unë e quaj si një këshilltare e një force politike”, tha Godole.
