Tre miliardë lekë ka dhënë Bashkia Himarë për dy oligarkë të qeverisë. Konkretisht bëhet fjalë për një tender krejtësisht abuziv, për pastrimin e resorteve në Himarë. Kjo kontratë është e ndarë në 2 lote, ku i pari kap vlerat 1.7 miliardë lekë dhe është fituar nga kompania e njohur për marrjen e tenderave pa garë “Fusha shpk”. Ajo që bie në sy është se do të shpenzohen kaq para vetëm për pastrimin e një pjesë të zonave; Jalë, Dhërmi, Palasa dhe Borsh, ku në fakt kanë resorte vetëm oligarkët dhe qeveritarët. Me pak fjalë, kryebashkiaku i Himarës , Jorgo Goro, po ia bën “hyzmetin” sikur duhet karriges së tij, duke i dhënë shërbime të tilla qeveritarëve.
Ky tender është mbyllur me një sërë shkeljesh, pasi së pari ka fituar garën kompania me ofertën më të shtrenjtë “Fusha” dhe janë skualifikuar pa argumente bindëse 2 kompanitë e tjera. Për këtë arsye, tenderi është denoncuar nga KPP. Në ankesën e dërguar evidentohet se në garë kanë marrë pjesë kompanitë “Alko Impex General Construction” & “Alko Impex Construction” SHPK për t’i hapur rrugë kompanisë së privilegjuar të qeverisë, Bashkia Himarë ka skualifikuar tre kompanitë e tjera me justifikimin se kanë probleme aritmetike në dokument dhe kështu tenderi i është dhënë automatikisht “Fusha shpk”. Pas denoncimit të bërë, KPP ka analizuar tenderin dhe ka evidentuar se kjo kontratë ka qenë me fitues të paracaktuar Shkëlqim Fushën. Pasi në çdo shërbim që merr, qeveria do të krijojë edhe një hapësirë përfitimesh për këtë oligark.
KPP ka dalë në konstatimin se në këtë raste është shkelur ligji i prokurimeve dhe gabimet aritmetike nuk përbëjnë shkak për të skualifikuar operatorët. Në fakt, kjo ka qenë e gjitha një skemë dhe për këtë arsye KPP ka kërkuar që tenderi të anulohet dhe të rivlerësohen sërish ofertat e kompanive të tjera, duke qenë se kanë marrë përsipër të kryejnë këtë shërbim me më pak kosto.
“Fusha” e rrethuar nga det me para
“Fusha shpk” është tashmë e njohur nga të gjithë si një nga kompanitë që fiton tenderat me vlerë të lartë pothuajse nga të gjitha bashkitë. Vetëm gjatë vitit të shkuar ajo ka fituar tendera të vlerës 500 milionë lekë për dezinfektim të zonave në Tiranë në bashkëpunim me një tjetër kompani. Ndërsa në 2019, kjo kompani ka thyer rekord duke fituar 35 kontrata nga Erion Veliaj që nga ndërtimi i sheshit “Skënderbej”, pastrimin e pjesës perëndimore të kryeqytetit, urës së Menikut etj. Madje kjo kompani ka përfituar edhe një tender 12 milionë euro nga Piramida.
Në fakt në çdo vit kjo “Fusha shpk” fiton tendera pa garë nga Veliaj dhe nga disa ministri. Nuk do mjaftonte koha të numërojë vetëm tenderat që janë marrë pa garë dhe në shkelje të ligjit. Pasi Shkëlqim Fusha është gjithmonë i mbuluar me parë që iu merren taksapaguesve shqiptarë.
1.2 mld lekë për lotin 2
Le të kthehemi te tenderi për të cilin po flasim. Sikur theksuam më lart ky projekt për pastrimin e resorteve në Himarë është i përbërë edhe nga një lot tjetër, i cili kap shifrat 1.7 miliardë lekë. Për këtë lot është bërë një denoncim nga “Reji shpk” , e cila tregon se ka qenë në garë me kompaninë “Pastrime Silvio” SHPK, si dhe me një tjetër kompani. Në përfundim, bashkia ka skualifikuar nga gara dy kompanitë, përfshirë edhe ankimuesin, me justifikimin se nuk kanë paraqitur dokumente të sakta dhe origjinalë. Më tutje Bashkia Himarë ka thënë se këta operatorë kanë pasur probleme aritmetike në dokumente si dhe nuk kanë përcaktuar numrin e saktë të punonjësve që do të jenë në gatishmëri për këtë shërbim. Ashtu si me lotin 1 edhe me lotin 2, bashkia ka skualifikuar nga gara kompanitë e tjera dhe ka shpallur fituese “Pastrime Silvio” SHPK.
Edhe për këtë rast, KPP ka pranuar ankesën e “Reji shpk”, ndërsa shprehet se të gjitha kompanitë kanë paraqitur dokumente të sakta dhe origjinale. Për rastet kur kanë gabime aritmetike, KPP i kërkon Autoriteti Kontraktor që të njoftojë ofertuesin dhe t’i japë kohë që rikorrigjim. Në përfundim, KPP konstaton se edhe për këtë lot gara është proceduar me kriteret burokratike për t’i hapur rrugë fituesit të paracaktuar. Kështu që ka anuluar tenderin dhe kërkon kthimin në garë për të gjitha kompanitë.
Skema e grabitjeve të Fusha shpk- Pastrime Silvio
Pra, sikur po shohim kanë përfituar nga një tender 2 kompanitë e akuzuara si më të korruptuarat dhe që në çdo rast veprojnë si “dy motra” binjake, për të pasur më shumë mundësi të fitojnë tenderin. Por si ndodh kjo? Fiqiri Allmuça me “Pastrime Silvio”, futet në garë në shumë tenderë së bashku me Shkëlqim Fushën, i cili ka kompaninë FUSHA shpk, pasi nëse fiton njëra, do të përfitojë edhe tjetra. Me këtë skemë po funksionojnë të dyja këto kompani, të cilat janë klientët më të privilegjuar të Bashkisë Tiranë. Tashmë duket se rrjetën e tyre po e shtrijnë edhe në bashkitë e tjera socialiste.
Kujtojmë edhe tenderin 1 mln euro për mirëmbajtjen e sheshit “Skënderbej” fituar nga “Pastrime Silvio” + “FUSHA”, ku në njoftimin e prokurimit publik shpallej fitues vetëm “Pastrime Silvio”, por nëse futeni në dokumentet e tenderit dilte dhe emri i Fushës. Të gjitha tenderat e marra nga kjo kompani janë të dyshimta dhe në mungesë konkurrence. Vetëm në 1 muaj, kjo kompani mori 500 mln lekë tendera pa garë.
Nuk mund të jetë aspak e papritur, se si qeveria iu lejon kompanive këto skema korruptive pasi pronarët e tyre janë miqtë më të mirë të Ramës dhe Veliajt. Madje, vlen të përmendim e Fiqiri Allmuça, i proceduar penalisht për konsumimin e veprës penale te “shkeljes se rregullave te mbrojtjes ne pune” në vitin 2008, ku 2 punëtorë te firmës u plagosën rëndë teksa po pastronin xhamat e jashtëm të një banke në kryeqytet. Kompania e tij, Pastrime Silvio, ka marrë rreth 2 milionë euro tendera të dyshimtë në mungesë konkurrence në një vit. Kështu, edhe pse KPP ka kapur shumë herë në shkelje tenderat që fitohen nga këto kompani, Rama urdhëron sërish bashkitë që ta gostitin me kontrata të shtrenjta.
Discussion about this post