Në ndeshjen e tij të tretë të përvojës së tretë në krye të Vllaznisë, Mirel Josa, është pranë fitimit të trofeut të parë si trajner i kuqebluve. A vlen në këtë rast shprehja “e treta e vërteta”? Në konferencën për shtypin një ditë para finales së Kupës, Josa shpjegon se fitorja në këtë përballje është detyrim.
“Suksesi është një detyrim që kemi ne ndaj klubit. E konsideroj si detyrim, edhe pse kam qenë pjesë e skuadrës kundërshtare, me të cilën përballemi nesër. Situatat në futboll kështu janë. Siç na duhet neve kjo fitore, i duhet dhe Laçit. Për klubin, për lojtarët dhe për stafin teknik është një trofe më tepër.
Për mua nuk ka interes si trofe individual, për mua ka interes që të plotësohen objektivat që ka klubi. Kemi punuar për këtë ndeshje. Është shumë e rëndësishme si për individët, ashtu edhe për grupin.
Sezoni i Vllaznisë: “Unë nuk dua të analizoj se çfarë gabimesh ka bërë Vllaznia, mua më intereson që idetë e mia t’u bashkëngjiten atyre të lojtarëve dhe të vazhdojmë punën që të kapim rezultat. Unë nuk mund ta përcaktoj një sezon të dobët të Vllaznisë, pavarësisht rezultateve.
Në momentet e caktuara duhet të kishte qenë më e vëmendshme, sepse po të kishte pasur 2-3 pikë më shumë, atëherë nuk do të flisnim për këtë gjë. Unë jam i fokusuar te Vllaznia dhe marr përgjegjësi për këto momente.”
Presioni i finales: “Futbollistët duhet të kenë presion vetëm për ta fituar ndeshjen. Në futboll janë tri rezultate në lojë, tani janë dy rezultate për finalen ose e fiton ose e humb.”
Mbështetja e tifozëve kuqeblu: “E njoh mirë tifozërinë e Shkodrës, e njoh mirë dashurinë që kanë për futbollin. Nuk ka nevojë për thirrjet e mia që tifozëria të vijë në Tiranë, por e di interesimin e tyre për skuadrën edhe në periudha të tjera që unë kam punuar këtu.”
Discussion about this post