Jozefiana Topalli ka deklaruar se ajo do të vazhdojë të mbështesë “Foltoret” e Sali Berishës, pasi është shpresë jo vetëm për PD, por edhe për të larguar Ramën nga drejtimi i shtetit. Ajo tha se, Berisha është vonuar në reagimin e tij dhe kjo ka sjellë kosto për PD, por gjithsesi tani është koha të ringrihet. “Është shumë i vonuar, kjo vonesë ka një kosto të madhe për Shqipërinë, jo vetëm për opozitën dhe PD. Por kur njeriu kërkon ndjesë, ndjesa nuk është dobësi, është forcë, është fuqi.
Pas kësaj ndjese dhe kësaj lëvizje që ai ka krijuar është vërtetë diçka shumë shpresëdhënëse jo thjesht për demokratët, është shpresëdhënëse sepse duke larguar Lulzim Bashën do të largojnë Edi Ramën. Kjo është thelbësore për të hapur një faqe të re”, shprehet ajo.
Ndër të tjera ajo tha se, çdo gjë është ekzagjeruar sepse nuk është kundërshtare e Bashës, por që vetëm ka shprehur qëndrimin e saj në lidhje me vendimet e gabuara të tij.“Unë nuk përfaqësohem nga vajza, vajza përfaqëson veten. Unë përfaqësohem nga qëndrimet e mia që nuk kanë ndryshuar dhe kam qenë koherente merr të gjitha qëndrimet e mia prej vitesh. Nuk jam kundërshtare e Lulzim Bashës thjesht nuk jam pajtuar me lidershipin e tij.
E vërteta është liria ime, kam thënë të vërtetën se ajo më jepte liri dhe nuk jam ndaluar asnjëherë pavarësisht presioneve dhe etiketimeve që vinin nga zyra e Lulzim Bashës dhe më vjen mirë që koha më ka dhënë të drejtë. Sigurisht që jam në këtë lëvizje me të gjitha qëndrimet e mia, jam shumë e përfshirë sepse gjej çdo gjë që unë kam menduar dhe për të cilën unë kam reaguar”, tha ajo.
Topalli zbuloi se shumë shpejt do ta shohim edhe fizikisht pjesë të foltores.
