Ish-kryetarja e Parlamentit, Jozefina Topalli, ka deklaruar ditën e sotme se ajo mund të kthehet në PD, por ka një kusht për këtë. Duke folur gjatë një interviste televizive për situatën në PD, Topalli tha se ajo vetë kthehet në PD vetëm në momentin që largohet Lulzim Basha.
“Unë kam thënë prej kohësh, kur të largojmë Lulzim Bashën, unë do të jem tek PD. Unë kam qenë me PD përpara se ajo të lindte. Këto lëvizje po bëhen për të rishikuar skenën politike shqiptare, do ketë ndikim rindërtimi, që do reflektojë dhe tek e majta. Kjo opozitë është kthyer në fatkeqësi dhe fatalitet për vendin. Se me këto skandale që kanë ndodhur, qeveria nuk mund të rrijë e qetë, por ne kemi një njeri që rri në zyrë e mban peng opozitën.
Basha shitur opozitarizmin, nuk flet dot për asnjë problem nëse ti shton vila, shton biznese e pasurinë tënde në mënyrë të pajustifikuar, e bën seleksionim oligarkësh, se me njërin je bashkë ndërsa tjetrit i vendos gjoba. Faji nuk është vetëm tek Rama, por te opozita e shitur”, tha ajo.
Që kur Basha e largoi nga listat e PD, Topalli ka qenë kritike ndaj tij, madje e akuzon atë se bënë kompromise me Ramën prapa krahëve të PD.
