Vdekja e Lear Kurtit ka sjell reagime të ashpra edhe sot. Në Lezhë, u protestua para komisariatit të qytetit nga të rinj të FRPD, por edhe të tjerë të rinj që janë bashkuar me kauzën. Ndërsa, ka nisur edhe protesta e qytetarëve para Ministrisë së Brendshme për ngjarjen e rëndë. Të rinjtë kanë thirrur në korr se policia e shteti janë vrasës. “Ju jeni vrasës”, ishte thirrja e tyre.
Opozita dhe shoqëria civile kanë kritikuar policinë për mënyrën sesi kanë vepruar me të riun, që ka gjetur edhe vdekjen pasi u shoqërua në komisariat. Qytetarët shprehen se janë përparta MB për të kërkuar llogari, që duket se nuk jepet askund. Qytetarët kanë thënë se poshtërimi i viktimës është vrasje e dytë për Lear Kurtit.
Të rinjtë përpara MB kanë ndezur edhe flakadanë, duke kërkuar llogari për atë që ka ndodhur me të riun. Protestuesit shtruan edhe pyetjen se kë thërret policia kur vret vetë. Po ashtu, protestuesit thanë se është detyrim ligjor që të ketë transparencë për ngjarjen e rëndë.
Lear Kurti humbi jetën pasi u shoqërua nga efektivët në komisariatin nr.3. Atij iu kërkua të ndalonte në orën 23:07 të mbrëmjes së 19 tetorit nga efektivët, në rrugën “Riza Çuka” në Laprakë, por vrapoi dhe u largua. Siç sqarohet në njoftimin e policisë, i riu është kapur pas ndjekjes, është dërguar në komisariat, ku ka shfaqur problemet e para shëndetësore. Fillimisht u aludua se i riu vuante nga epilepsia, më pas, në deklaratën zyrtare u tha se i riu kishte gëlltitur një qese me lëndë narkotike.
Kontradikta është në faktin që efektivët pretendojnë se ka ndërruar jetë në spital, ndërsa bluzat e bardha të Traumës thonë se Kurti ka mbërritur pa shenja jete në duart e tyre. Paraprakisht, nga hetimet e derimë tanishme, është deklaruar se në trupin e viktimës nuk kishte shenja dhune. Por për kryedemokratin Sali Berisha, Kurti u vra nga Policia dhe ngjarja po mundohet që të mbulohet ashtu si rasti i Klodian Rashës, 2 vite më parë, i cili u qëllua për vdekje nga një efektiv policie.
Discussion about this post