Juventus nuk e nis me këmbën e mbarë sezonin e ri futbollistik. Zonja e vjetër është ndalur në barazim ndaj Udineses.
Në pjesën e parë të besuarit e Allegrit bënë një lojë të shkëlqyer duke e mbyllur me avantazhin e dy golave, ku autorët ishin Dybala në minutën e 3-të dhe Cuadrado dyfishoi në minutën e 23. Por pjesa e dytë bëri që Udinese të zgjohej dhe të përgjigjej me një dygolësh në fillim në minutën e 51 me një penallti të Pereira-s dhe më pas në minutën e 83 me Deulofeu.
Pas pësimit të golit të parë, bardhezinjtë në minutën e 60 hodhën në lojë armatën e rëndë ku një prej tyre ishte dhe Cristiano Ronaldo që e nisi nga stoli këtë ndeshje. Në minutën e fundit, portugezi shënoi me kokë dhe hoqi bluzën për të festuar, por VAR ishte ai që i ‘ngriu’ buzëqeshjen dhe i anuloi golin e fitores.
