Kandidati për kryetar të PD-së, Fatbardh Kadilli, ka zhvilluar ditën e sotme takim me qytetarët në Korçë.
Kadilli u shpreh se nëpërmjet projektit të tij, siç edhe ai e quan “projekti i lirisë”, arriti të krijojë mundësitë që në Partinë Demokratike të ketë garë.
“Arrita një fitore, arrita që PD të ketë garë. Sot mburremi kemi 4 kandidatë dhe kush e bëri këtë? Projektim im, projekti i lirisë, i njeriut që kur bie gjen forcë të ngrihet”, tha më tej ai.
Ndërsa foli për mediat, ai ritheksoi se kryedemokrati Lulzim Basha, pas humbjes së zgjedhjeve të 25 prillit duhet të kishte dhënë dorëheqjen.
“Lulzim Basha humbi, zgjedhjet nuk ishin të barabarta dhe aspak të ndershme. Termi “masakër zgjedhore” nuk më impresionon aspak. Kë do të impresionojë Basha me këtë, apo do të zbukurojë humbjen e vet. Lulzim Basha humbi, të largohet dhe t’i japë frymëmarrje partisë. Ka 8 vjet që është aty”, u shpreh ai.
Po ashtu Kadilli u shpreh se ndodhet në një garë të pabarabartë dhe se pavarësisht kësaj kjo nuk e penalizon atë, sepse sipas tij ai ka epërsi morale, për të cilën shton se është njeriu që ka marrë përgjegjësinë për të ringritur Partinë Demokratike.
“Gara nisi e pabarabartë është asimetrike sepse kryetari në zyrë i ka të gjithë mjetet për të bërë fushatë. Por edhe në aspektin moral është asimetrike për mua. Por unë kam epërsinë morale, epërsinë e atij që i ka thënë gjërat në kohën e duhur dhe sot merr përgjegjësitë për të ringritur Partinë Demokratike, jo vetëm, por duke forcuar anëtarin e PD-së.
Motoja ime është e thjeshtë anëtar i partisë, bëhu kryetar i vetes tënde, mos prit të bësh karrierë nga kryetari në Tiranë, merr vetë përgjegjësinë, drejto vetë partinë, je ti ai që bën ndryshimin. Zgjidhi vetë kandidatët për bashkitë, jo t’i caktojë dikush nga Tirana. Kjo i duhet partisë për ta kthyer në një parti më të madhe se kryetari, një parti që frymëzon”, tha Kadilli.
