Shqipëria renditet në një nga vendet me trafikun më të madh të drogës, ndërsa raportohet së ne vitet e fundit janë shtuar në numër të lartë edhe përdoruesit. Më alarmante duket situata, kur bëhet me dije se droga shpesh futet edhe në shkolla dhe adoleshentët po bien çdo herë më shumë pre e saj. Në lidhje me këtë çështje ka folur sot në një interviste televizive drejtori i Aksion Plus Genci Muçollari, organizatë që merret me çështjet sociale, përfshirë dhe përdorimin e drogës. Ai u shpreh se ka rritje të numrit të përdoruesve. Konkretisht bëhet fjalë për 200 deri në 300 përdorues të shtuar vetëm në 5 vitet e fundit.
“Ne nisemi nga shifrat që kemi në qendrat tona por dhe nga shifrat e publikuara nga Ministria e Shëndetësisë. Gjithmonë kemi rritje të numrit të përdoruesve të drogës. Për shembull nëse në 1995 kishte një numër prej 6 mijë përdorues të të gjitha drograve tani bëhet fjalë për 50 mijë deri 60 mijë përdorues që mund ta kenë përdorur drogën një herë në jetën e tyre, ndërsa 7 mijë deri 8 mijë janë përdorues të drograve të rënda që në njëfarë mase duan një lloj terapie, trajtimi. Edhe në qendrën tonë rritjet kanë qenë të po kësaj mase po të flasim para 5 vitesh kemi pasur rreth 700-750 klientë. Tani bëhet fjalë për 950 dhe numrat janë në rritje”, tha ai.
Ai u shpreh se ka dhe përdorues të moshave të vogla ku më e ulëta ishte 10 vjeç dhe këtu iu kërkohet prindërve që të jenë më të vëmendshëm ndaj sjellëve që bëjnë fëmijët e tyre, pasi kjo grup moshë dallohet më lehtë nëse perdorin lëndë të tilla. “Flasim për përdorues midis të rinjve që numri është rritur, përdorimi i heroinës e kokainës është rritur pothuajse dyfish. Grupmosha mesatare është nga 22 deri 35, ka dhe raste heroine ku shkon deri në 10 vjeç”, tha ai. Gjithashtu Muçollari foli dhe për vështirësitë me të cilat hasen pasi nuk kanë staf për të përballuar fluksin e personave që kanë nevojë për trajtim.
Discussion about this post