Ish-ministri i Brendshëm Saimir Tahiri, i dënuar për shpërdorim detyre me 3 vjet e 4 muaj heqje lirie, ka bërë kërkesë në Gjykatë për pezullimin e dënimit me burg. Sipas Tahirit, vendimi i Apelit është marrë në kundërshtim me ligjin.
Kujtojmë që procesi ndaj Tahirit është i pari nga drejtësia e reformuar ndaj një ish-zyrtari të lartë i cili u dënua në 4 shkurt nga GJAKK me burg me akuzën për shpërdorim të detyrës.
Pas dhënies së vendimit nga Gjykata e Posaçme e Apelit për Korrupsionin dhe Krimin e Organizuar (GJAKK), organi i akuzës firmosi urdhër – arrestin. Ish-ministri i Brendshëm, Tahiri doli me pranga në duar nga salla e gjykatës dhe u dërgua në mjediset e paraburgimit të burgut 313, burg i sigurisë së zakonshme, që ndodhet në Tiranë ku më pas u transferua në burgun e Fierit.
Ish-ministri i Brendshëm Tahiri dhe avokati i tij Maks Haxhia asokohe reaguan ndaj vendimit me burg: “Është thjesht padrejtësi. Jam moralisht i qetë. Nuk kam shkelur ligjin, kam bërë detyrën si më mirë çmunda”, ka theksuar pas dhënies së vendimit ish-ministri i Brendshëm, në një postim në Facebook.
Avokati i tij, Haxhia, të cilit trupi gjykues nuk i dha të drejtën e fjalës gjatë seancës, ku u mor vendimi, deklaroi, pas dërgimit të Tahirit në mjediset e paraburgimit se do të kundërshtojnë vendimin në Gjykatën e Lartë, “do të bëjmë rekurs, presim zbardhjen e vendimit të arsyetuar,” theksoi ai. Ligji parashikon që rekursi në Gjykatën e Lartë të bëhet brenda 45 ditëve duke filluar nga dita e vendimit.
Discussion about this post