Partia Demokratike ka reaguar pas mbledhjes së parë të qeverisë së re, e cila nisi sot zyrtarisht detyrën për mandatin e tretë, pas betimit në Presidencë.
Deputetja Oriola Pampuri, i ka konsideruar si bajate deklaratat e kryeministrit në mbledhje, teksa rikujtoi darkën e qeverisë te një nga restorantet më të shtrenjta në Dubai, dhe hotelet 700 euro ku ministrja Etilda Gjonaj kalonte natën.
“Propaganda bajate e qeverisë më të korruptuar në Ballkan, i darkave te Nusreti dhe hoteleve 700 euro nata, shfaq si risi kodin e etikës që qysh prej 2013-ës përdori për t’u hedhur hi syve, qytetarëve”.
Sipas Pampurit, Kodi Etik për të cili Rama foli sot me aq zell, nuk është zbatuar ndonjëherë as nga qeveritë e mëparshme të tij, dhe lidhur me këtë ka përmendur edhe raste konkrete.
“Të gjithë e mbajmë mend me sa ‘”etikë” u ngrit sistemi nepotik në qeveri, me sa “etikë” vëllezër e kushërinj ministrash gëzuan paprekshmërinë për t’u kthyer në zota të drogës dhe trafiqeve, duke dëshmuar se fjalët e shumta mbi etikën fshihnin pikërisht mungesën e saj, pasi si atëherë edhe tani, PPP-ja Rama, Doshi, Rakipi, bashkëqeverisjen, e ka me krimin dhe kundër interesave të shqiptarëve”, shkruan Pampuri.
Kryeministri Rama bashkë me 16 ministrat e tij shkuan paraditen e sotme tek presidenti Ilir Meta ku morën zyrtarisht detyrën. Pas betimit, kabineti qeveritar “Rama 3” u mblodh për herë të parë, ku kryeministri dha edhe porositë e fundit. Rama kërkoi të mos abuzohet me detyrën si dhe të ketë një mirëkuptim mes qeverisë dhe opozitës.
