Kadastra “kthen mendje” u heq lejen vjetore punonjësve dhe i rikthen në punë, zbardhen arsyet…

Agjencia Shtetërore e Kadastrës  njoftoi prej 3 korrikut procesin i digjitalizimit,  ndryshim i cili ka privuar qytetarët nga marrja e shërbimeve.

Eksperti i njohur i IT-së, Gent Progni ka ndarë në rrjete sociale një dokument që mban firmën e Kiara Haskaj, drejtoreshë e Drejtorisë Tirana Veri.

Haskaj ka urdhëruar revokimin e lejeve vjetore të paguara për muajin gusht, për punonjësit që tashmë i kanë nisur pushimet, ndërsa për ata punonjës që nuk i kanë ezauruar ende lejet është vendosur pezullim i tyre.

Referuar dokumentit të publikuar nga Progni dhe të firmosur më datë 16 Gusht 2023, shkak për revokimin dhe pezullimin e lejeve vjetore është bërë “fluksi i lartë i punës” në Drejtorinë e Kadastrës Tirana Veri.

Ky institucion është vënë muajin e fundit në qendër të akuzave, pasi qytetarët nuk mund të marrin dot certifikatat e pronësisë dhe dokumentet e tjera të pronave të tyre, sepse shërbimi është bllokuar.