Anëtari i Këshillit Kombëtar, Fatbardh Kadilli nuk i ka kursyer kritikar as gjatë fjalës së tij në Kuvendin Kombëtar të PD-së, ndaj liderit të kësaj partie Lulzim Bashës dhe as ndaj ish-kryedemokratit Sali Berisha. Ai iu tha të pranishmëve se po servirin një realitet të bazuar mbi iluzione, kur në fakt kriza e vërtetë e kësaj force politike nisi në 26 prill, një ditë pas zgjedhjeve parlamentare të 25 prillit, ditë në të cilën sipas Kadillit Basha duhej të ishte dorëhequr.
“Do të kërkoja të imagjinonim për një moment një vend në botë ku ka votime që një parti që humbet katër herë rresht, imagjino që partia ka dështuar në shumë aksione politike, imagjinoni partinë që nuk bën asnjë analizë për humbjet por vetëm fajëson kundërshtarin politike, imagjinoni që udhëheqësi nuk jep dorëheqjen por vazhdon njësoj si më parë. Çfarë do të mendonit për atë parti? Imagjino sikur përsëri befas plas një konflikt i brendshëm dhe udhëheqësit të saj i kërkohet dorëheqja, ndërsa ai përgjigjet përjashtime. Ju në këtë sallë keni një tregim krejt tjetër. Por është një tregim që mbushet me iluzione dhe me gënjeshtra. I keni harruar të gjitha ditët dhe datat kur konflikti ishte brenda. Lëvizja e Sali Berishës ndezi vetëm fitilin. 26 prilli ishte data e vërtetë e krizës, kur Basha nuk dha dorëheqjen. Më 26 prill PD vendosi të jetë një parti e vogël që udhëhiqet nga një njëri që nuk e njeh fitoren. PD ka më shumë se kushdo në historinë e saj për një ndryshim të thellë. Sali Berisha po i shet demokratëve iluzionin e ndryshimit. Nga arroganca juaj sot shumë demokratë gjejnë shpëtim të Berisha”, tha Kadilli.
Ai theksoi se PD-në nuk mund ta sjellë në pushtet as Berisha dhe as Basha por dikush tjetër që mund të jetë i aftë të sjellë një frymë të re brenda partisë.
“Ju i keni injoruar të gjitha ndryshimet që unë kam propozuar, dhe që janë domosdoshmëri që PD të ringrihet. Keni një shans. Në këtë sallë është larguar një herë Enveri por jo enverizmi, ta largojmë përfundimisht berishizmin”, u shpreh Kadilli.
Kujtojmë se Fatbardh Kadilli ishte një ndër zërat e parë që doli kundër Lulzim Bashës, pas humbjeve të zgjedhjeve parlamentar të 25 prillit, si dhe kandidoi për të marrë postin e kreut të PD-së, por nuk ia doli të siguronte votat e duhura nga demokratët.
Discussion about this post