Kompania e sigurimit INSIG sha ka marrë vitet e fundit 160 kontrata nga institucionet publike dhe të gjitha me “Flamur të kuq”. Kjo është shenja e riskut të korrupsionit që përdor Open Data Albania në klasifikimin e procedurave të prokurimit. Filtrat e kapin menjëherë INSIG sepse në këto tendera ka mungesë konkurrence. Kështu ndodh kur fituesi është i paracaktuar ose i privilegjuar, siç është pronari i kësaj kompanie Kadri Morina.
Për shkak se Morina ka pozuar në krah të Ramës, sa herë që ka ndonjë fatkeqësi (përmbytje, tërmete) drejtorët e marrin këtë si mesazh apo porosi dhe ia japin Morinës të gjitha tenderat e siguracioneve.
Kështu, drejtorja e Shërbimeve Qeveritare, Dhurata Frashëri e ka bërë tenderin e fundit me vetëm një pjesëmarrës. Më 2 maj 2025, drejtoresha bëri publike kontratën me Morinën për Loti 1: “Siguracion i ndërtesave”, me fond limit: 987,450 Lekë pa TVSH.
Siç njofton vetë drejtoria, në këtë procedurë ka marrë pjesë vetëm Operatori Ekonomik – INSIG SH.A. Oferta është gati sa 99.9% e fondit limit, 987,350 Lekë pa TVSH.
Dhe meqenëse e ka nisur me Kadri Morinën, Drejtoresha ka vazhduar me Loti 3: “Siguracion i automjeteve”, me fond limit: 2,692,340 Lekë pa TVSH. Edhe këtë tender e ka marrë INSIG pa garë.
Po ashtu, Loti 2: “Siguracion i veprave të artit”, me fond limit 499,893.3 Lekë pa TVSH i ka shkuar shoqërisë së Morinës.
Sipas dokumenteve, kriteri i përzgjedhjes së fituesit të tenderit duhet të ishte oferta ekonomikisht më e favorshme bazuar në çmim. Por, Kadri Morina konkurron vetëm me veten.
Ndërsa qershinë mbi tortë e vë drejtori i përgjithshëm i Burgjeve, Klevis Qose. Ky i ka dhënë tenderin e sigurimit të ndërtesave të burgjeve Kadri Morinës në një procedurë pa garë. Në tenderin me fond limit 99 587 442,00 lekë kanë marrë pjesë vetëm dy kompanitë e Morinës: INSIG SHA dhe Eurosig SHA.
Open data Albania e ka klasifikuar tenderin me “Mungese konkurrence”. Prokurimi zhvillohet me një konkurrent të vetëm. Ligji shqiptar i lejon këto lloj procedurash, por në praktikë shpesh shoqërohen me opsione të formulimit të kritereve dhe afateve për dorëzim të dokumenteve në favor të një kompanie të paramenduar klienteliste. Këto tendera konsiderohen të ekspozuara dhe me risk për korrupsion. Më konkretisht, bëhet fjalë për tenderin me objekt “Sigurim i godinave për sistemin e burgjeve”.
Një tjetër element shqetësues është se kjo procedurë prokurimi është rishpallur. Rishpalljet janë përdorur shpesh si një mjet për të krijuar kushte specifike që eleminojnë konkurrentët realë dhe favorizojnë një operator të caktuar.
Kontrata parashikon një kohëzgjatje prej 48 muajsh (4 vjet) dhe është fituar me një vlerë shumë pranë fondit limit, gjë që normalisht bie ndesh me logjikën e një tenderi konkurrues, ku operatorët përpiqen të ofrojnë çmimin më të ulët për të fituar pikë.
Në këtë rast, jo vetëm që nuk ka kursim për buxhetin e shtetit, por pagesa ndaj kompanisë Eurosig shkon pothuajse deri në tavanin e lejuar nga fondi limit.
Nga ana tjetër, marrëveshja kuadër me një operator të vetëm mund të bëhet vetëm në raste të veçanta dhe me justifikim të fortë ligjor, gjë që në këtë rast nuk është bërë publike dhe mbetet e dyshimtë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post