Republika Islamike e Iranit do të mund të bënte material të mjaftueshëm të zbërthyeshëm për një bombë bërthamore për rreth 12 ditë, tha të martën një zyrtar i lartë i Departamentit të Mbrojtjes të ShBA-së, kohë shumë më e shkurtër se koha e vlerësuar prej një viti, kur në fuqi ishte marrëveshja bërthamore e vitit 2015 me Iranin.
Nënsekretari i Mbrojtjes për Politikë, Colin Kahl, e bëri këtë koment në një seancë dëgjimore të Dhomës së Përfaqësuesve, kur u pyet nga një ligjvënës i Partisë Republikane se pse administrata e presidentit Joe Biden është munduar që ta ringjallë marrëveshjen bërthamore me Iranin, raporton agjencia “Reuters”.
“Sepse përparimi bërthamor i Iranit nga koha kur ne u larguam nga JCPOA (marrëveshja bërthamore), ka qenë i konsiderueshëm. Më 2018, kur administrata e kaluar vendosi që të largohej nga JCPOA, do të nevojiteshin rreth 12 muaj për të prodhuar material të zbërthyeshëm për një bombë. Tash do të nevojiteshin rreth 12 ditë”- tha zyrtari i tretë më i lartë i Departamentit të Mbrojtjes para ligjvënësve.
“Dhe kështu, unë mendoj se ende është pamja që nëse do të mund ta zgjidhnit këtë çështje në mënyrë diplomatike dhe t’i kthenit kufizimet në programin e tyre bërthamor, është më mirë se opsionet e tjera, por tash për tash, JCPOA është në akull”- shtoi Kahl-i.
Zyrtarët amerikanë vazhdimisht kanë vlerësuar se Iranit i nevojiten disa javë për të siguruar material të zbërthyeshëm të mjaftueshëm për një bombë bërthamore, nëse e synon këtë, por nuk kanë qenë kaq specifikë sa nënsekretari Kahl.
Përderisa zyrtarët amerikanë thonë se Irani i është afruar prodhimit të materialit të zbërthyeshëm, ata nuk besojnë se ky shtet e ka zotëruar teknologjinë për të prodhuar vërtet një bombë.
Sipas marrëveshjes së vitit 2015, të cilën më pas e braktisi ish-presidenti amerikan, Donald Trump, më 2018, Irani u nënshtrohej disa kufizimeve ndaj programit të tij bërthamor në këmbim të lirimit nga disa sanksione ekonomike. Trump-i ia ktheu në fuqi sanksionet amerikane Iranit, duke e nxitur Teheranin që ta rifillonte punën bërthamore që i ndalohej më parë, duke e ringjallur frikën e ShBA-së, Evropës e Izraelit se Irani mund ta synojë prodhimin e një bombe bërthamore. Irani ka mohuar se ka ambicie të tillë.
Gjatë dy viteve të fundit, administrata e presidentit Biden është munduar që ta ringjallë marrëveshjen bërthamore, por deri më tani ka dështuar.
Discussion about this post