Mesfushori premtues belg, Charles De Ketelaere mund t’i japë fund eksperiencës së tij, të dështuar, te Milani. Futbollisti, i afruar me shumë bujë si “Kaka i ri”, ka lënë plotësisht për të dëshiruar në vitin e tij të parë te kuqezinjtë dhe tashmë po bëhet gati për një tjetër aventurë.
Mediat në Itali raportojnë prej ditësh për kontakte mes Atalantës dhe kuqezinjve për transferimin e futbollistit dhe duket se më në fund është gjetur një akord.
Charles De Ketelaere do të transferohet në huazim për vlerën e 3 milionë eurove, ndërsa zikaltrit do të kenë të drejtën e blerjes së kartonit të tij në fund të këtij edicioni për 23 milionë euro.
Te Milani janë dorëzuar sa i përket futbollistit dhe shpresojnë që të bindë Atalantën që ta blejë, pasi nuk kanë vendosur në kontratë klauzolën e kundërofertës.
Charles De Ketelaere ka marrë një ofertë edhe nga Real Sociedad, por mendohet se sot do të kthejë përgjigjen pozitive përfundimtare për Atalantën dhe të firmosë transferimin e tij te bergamaskët. Një klub ku janë rivlerësuar shumë futbollsitë, e ku ai pret të ndodhë e njëjta gjë edhe me të.
Discussion about this post