“Jam i kënaqur të shoh Maldinin që punon shumë mirë si menaxher”. Fjalë e Ricardo Izecson Dos Santos Leite, i njohur ndryshe si Kaka, për punën e mikut të tij, Paolo Maldini, si drejtor i zonës teknike të Milanit.
“Jo se e dija, por e imagjinoja që kur luante. Për mënyrën se si është gatuar, për vullnetin e tij, për karakterin dhe për mënyrën se si e përballon jetën dhe futbollin. Ishte e mrekullueshme ta shihje atë të fitonte titullin vitin e kaluar. Jam shumë i kënaqur dhe për mua Maldini është një shembull. Ai është rikthyer në futboll pas 10 vitesh dhe mbase do të marrë të njëjtën kohë edhe për vete (qesh)”, tha Kaka për “Radiorossonera”.
Braziliani ka komentuar edhe projektet e tij të ardhshme, të cilat nuk përfshijnë rikthimin në futboll me një rol të ri.
“Prej 5 vitesh kam ndaluar së luajturi, kam studiuar pak futboll, sepse doja të mësoja. Kam parë që për të bërë një punë të mirë në këtë sport duhet të marrësh shumë kohë dhe të punosh fort. Për momentin dua shumë të jem pranë familjes sime, ndaj nuk mendoj se rikthimi im në futboll do të jetë i shpejtë”.
Discussion about this post