Aktivisti dhe kreu i degës së Partisë Demokratike në Krujë, Aulon Kalaja, i ka bërë thirrje kryebashkiakut të Tiranës, Erion Veliaj, që të organizojë një revoltë nga burgu i Fierit kundër kryeministrit Edi Rama.
I ftuar në emisionin “Off the Record” , Kalaja pretendoi se ka pasur përpjekje që të burgosurit të dalin në protestë. Ai ngriti gjithashtu akuza për gardianët e burgut, duke deklaruar se, sipas informacioneve që disponon, pajisjet e magazinave të burgjeve janë dërguar në protestë.
“Organizo revoltën nga burgu i Fierit sa më urgjentisht. Duhet të dalin. Ka pasur tentativa që të burgosurit të dalin në protestë. Është në kohë, se është kundër Edi Ramës në këto momente. Ka kredon politike, e ka edhe personale”, u shpreh Kalaja.
Ai shtoi se një revoltë e tillë mund të shkaktonte, sipas tij, një efekt zinxhir, ndërsa pretendimet për pajisjet e burgjeve nuk i shoqëroi me prova në deklaratën e cituar.
Kalaja komentoi edhe transferimin e Veliajt nga burgu i Durrësit në atë të Fierit, të cilin e cilësoi si hakmarrje politike nga ana e kryeministrit Rama. Sipas tij, ky veprim erdhi pasi Veliaj foli për protestat studentore në Serbi dhe zhvillimet që çuan në largimin e Aleksandar Vuçiçit.
“Doli Veliaj e foli për protestën, se iu drejtua Ramës, e pe çfarë i bënë? E nxorën për leckash nga burgu i Durrësit e çuan në Fier. Është hakmarrje”, deklaroi Kalaja.
Ai e lidhi këtë pretendim edhe me qëndrimin e kryeministrit ndaj protestuesve, duke iu referuar shpërblimit prej 2,500 eurosh për efektivët e policisë, për të cilin ka folur Rama.
Discussion about this post