Kaloi 7 javë larg çdo ekrani, autori tregon se si kujtesa e tij u përmirësua në mënyrë drastike

Ekspertët paralajmërojnë se kalimi i tepërt i kohës para ekranit mund të dëmtojë përpunimin dhe mbajtjen e informacionit. Studimet tregojnë se përdorimi i shpeshtë i smartfonëve mund të jetë i lidhur me kujtesë të dobët dhe vështirësi në përqendrim

Sipas një raporti nga Opal, Britania e Madhe është një nga vendet me përdorimin më të lartë të telefonave në Europë, ku një përdorues mesatar shpenzon rreth 5 orë e 6 minuta në ditë duke lëvizur nëpër ekran. Kjo do të thotë se 28% e ditës shpenzohet duke parë postime në Instagram apo platforma të tjera sociale.

Por çfarë do të ndodhte nëse do të hiqnim dorë nga teknologjia për disa javë?.Kjo është pikërisht ajo që Carlos Whittaker, autor dhe spiker, vendosi të testonte në verën e vitit 2022. Ai kaloi shtatë javë e gjysmë pa asnjë ekran, duke u fokusuar te familja e tij dhe duke qëndruar pjesën tjetër të kohës në një manastir dhe një fermë.

Rezultatet ishin befasuese!

Sipas Whittaker, kujtesa e tij u përmirësua në mënyrë drastike. “Nga 50% e mesatares së burrave amerikanë, unë arrita në 99%, duke e kaluar pothuajse çdo person tjetër,” tha ai gjatë një interviste në Dr John Delony Show.

Studimet shkencore e mbështesin këtë fenomen. Qendra e Stanfordit për Longevitet sugjeron se ekspozimi i vazhdueshëm ndaj ekraneve mund të ndikojë negativisht në aftësitë e të mësuarit, kujtesës dhe shëndetit mendor. Ndërkohë, Neurology Center for Epilepsy & Seizures thekson se një mbingarkesë informacioni mund ta vështirësojë përpunimin dhe ruajtjen e tij në tru.

Ekspertët këshillojnë që të zbatojmë një detoks dixhital, të përfshijmë aktivitete që stimulojnë trurin dhe të bëjmë të paktën 30 minuta aktivitet fizik çdo ditë.

Përveç përmirësimit të kujtesës, reduktimi i përdorimit të telefonit mund të përmirësojë gjithashtu vetëbesimin, produktivitetin dhe higjienën e gjumit, sipas WebMD.

Nëse ndiheni të varur nga telefoni, ka disa mënyra për ta thyer këtë zakon. Mund të vendosni kufizime në përdorimin e ekranit, të mbani telefonin larg dhomës së gjumit ose të ndiqni terapi CBT (Terapia e Sjelljes Kognitive), sipas PsychCentral.