Qeveria e Ukrainës u ka bërë thirrje refugjatëve të luftës, që të mos kthehen deri në pranverën e vitit të ardhshëm. Kjo për shkak të mungesës së energjisë elektrike dhe ngrohjes.
“Nëse keni mundësi, kalojeni dimrin jashtë shtetit!” ka thënë zëvendëskryeministrja ukrainase, Iryna Vereshchuk të martën në televizionin kombëtar.
Sistemet e energjisë janë jostabile për shkak të sulmeve ruse, ka thënë ai.
“Ju e shihni çfarë është duke bërë Rusia, secili e sheh atë gjë. Ju, fëmijët tuaj, gjithë familjarët tuaj që janë të sëmurë, kanë pak mundësi për të lëvizur apo janë edhe në moshë”, ka thënë Vereshchuk.
“Ne duhet të tejkalojmë këtë dimër”.
Mirëpo ajo ka thënë se pranverën e ardhshme mezi pret të shohë njerëzit duke u kthyer për të rindërtuar atë që është shkatërruar dhe për të dërguar fëmijët në shkollat ukrainase.
Ushtria ruse ka përdorur raketat dhe sulmet me dronë prej 10 tetorit, për të shkatërruar shumë objekte që ofrojnë shërbime të energjisë dhe ngrohjes në Ukrainë.
Qeveria e Kievit ka thënë se Moska synon që të thyejë gatishmërinë e Ukrainës për të rezistuar, dhe që të nxisë një valë të re të refugjatëve në shtetet tjera evropiane.
Sipas Agjencisë së Kombeve të Bashkuara për Refugjatë, rreth 7.7 milionë refugjatë janë regjistruar në shtetet tjera evropiane prej kur ka nisur lufta e Rusisë në Ukrainë më 24 shkurt.
Brenda Ukrainës janë zhvendosur miliona të tjerë. Lufta në Ukrainë ka nisur më 24 shkurt. Presidenti rus, Vladimir Putin, e konsideron luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra. Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.
Discussion about this post