Në lidhje me deklaratën e kryetarit të Partisë Demokratike, Lulzim Basha i cili tha se ka mbështetjen e 95% të demokratëve, ka reaguar deputeti i kësaj partie Edi Paloka. Në një postim në rrjetet sociale, Paloka i kërkon Bashës që pas kësaj deklarate, të kërkojë votëbesimin e demokratëve për drejtimin e partisë.
“Mos jep dorëheqje, nëse ke bindjen qe ke vepruar drejte dhe për këtë ke mbështetjen e 95% të demokratëve, kërko votëbesimin e tyre dhe ndale përçarjen që po thellohet çdo ditë e më shumë prej vendimit tënd personal të 9 shtatorit!” – shkruan Paloka.
Ai gjithashtu thotë se nëse 95% të demokratëve janë në mbështetje të tij, atëherë Basha ka gjithë të drejtën legjitime të vazhdojë në krye të PD.
“Nëse 51% e jo 95% e demokratëve të mbështesin, ke gjithë legjitimitetin të vazhdosh në krye të PD e te gjithë demokratët kanë detyrimin të bashkohen për të bërë betejën me atë që është armiku jo vetëm i demokratëve po i gjithë shqiptarëve, Edvin Kristaq Ramën!” – shkuran më tej Paloka.
Kreu i opozitës në konferencën me gazetarët ditën e sotme ku foli për amendamentet që propozon PD, ndër të tjera tha se sipas sondazheve të tij, 95% e demokratëve kërkojnë që ai të udhëheq betejën kundër regjimit Rama-Doshi-Rakipi.
Ndërsa kujtojmë se Edi Paloka është një ndër deputetët që kanë kundërshtuar hapur vendimin e kryetarit të PD-së për largimin e Berishës.
