Deputetja demokrate ka reaguar sot në lidhje me protestën e djeshme. Përmes një postimi në Facebook ajo iu ka dhënë një përgjigje të gjithë atyre që ishin skeptik për pjesëmarrjen e saj. Tabaku shprehet se pavarësisht përplasjeve që mund të ketë brenda partisë, ajo ka marrë dhe do të marrë gjithmonë pjesë në protestat e Partisë Demokratike. Sipas saj, në këto momente e rëndësishme është që të gjithë të bashkohen për të shpëtuar vendin nga kthetrat e kësaj qeveria që ka zaptuar vendin dhe nuk ka ndërmend ta lëshojë.
“Do shkosh në protestë s’do shkosh në protestë! Kjo ishte pyetja që mu bë parreshtur dje. A thua se kjo protestë bëhej për të ndarë se kush ishte me partinë dhe kush me armikun. “Në fakt për këtë bëhet!”, thoshin miqtë e mi. Po unë që s’kam munguar në asnjë protestë të demokratëve, madje as kur isha shtatzënë dhe na hidhej gaz pa kursim, nuk kisha dilemë! Në protestat e demokratëve duhet shkuar. Për të tjerat ka kohë pas protestës.
Tani që jemi tek të tjerat dua të ndaj me demokratët ndjesitë e mia nga protesta. Pjesëmarrja ishte e mirë, aq më shumë që nuk jemi në stinën më të përshtatshme për protesta të kësaj natyre, të cilat nuk shkojnë dot përtej një manifestimi partie. Nga numrat nuk mund të kërkoje më shumë, ndërsa nga çfarë u tha dhe u dëgjuar nuk mbeti më shumë se sa çfarë është thënë e dëgjuar qysh prej vitit 2013. Madje më pak do të thosha, por nuk po e them për të mos krijuar ndonjë ide të gabuar se po krahasoj protagonistë të ndryshëm. Mbeti po ashtu e njëjta shije pamjaftueshmërie dhe përsëri sot, njësoj si pas të gjitha protestave të panumërta prej 9 vjetësh, kryeministri është po ai”, shkruan ajo.
Tabaku shprehet se PD duhet të vazhdojë me protestat për të rimarrë rolin e opozitës, ndërse theksoi se kaq nuk është e mjaftueshme për të larguar regjimin nga vendi. Sipas saj, me rëndësi është që njerëzit ta kuptojnë të gjithë se ka ardhur koha për ndryshim. “Demokratët kanë nevojë për protesta, padyshim. Por që pas 3 vjetësh të tjera me po këtë kryeministër dhe pas të tjera protestave si kjo, Edi Rama të mos rrëmbejë mandatin e katërt, Shqipëria ka nevojë për një shpresë të re. Këtë nevojë protestat as nuk e plotësuan deri dje, as nuk do ta plotësojnë dot deri asnjëherë. Sepse për këtë nuk mjafton të mbledhësh njerëz për të protestuar. Duhet mbledhur mendja për të ndryshuar”, u shpreh ajo. Kujtojmë se në protestën e djeshme kishte mjaftë deputetë të PD që janë nga grupi u Enkelejd Alibeajt.
Discussion about this post