Nga konflikti që ndodhi në Korçë mes dy pronarëve të bizneseve në malin e Moravës, kanë dalë disa detaje të reja. Ngjarja përfundoi me një të plagosur me thikë dhe një të arrestuar, ndërsa të tjerët që u përfshinë në sherr u proceduan penalisht në gjendje të lirë.
Kamerat e sigurisë kanë filmuar momentin kur disa të rinj, të ndarë në grupe, janë përplasur me njëri-tjetrin.
Nuk dihet ende zanafilla e sherrit, por në foto mund të shikohet qartazi djali i Sotiraq Mishës kur i ka vënë armën në kokë 26-vjeçarit Anri Reli, pasi kanë debatuar. Më pas sherri ka degraduar dhe gjatë përleshjes, për t’u vetëmbrojtur, Anri Reli ka goditur me thikë Sotiraq Mishën.
Për ngjarjen është arrestuar vetëm një person, Anri Reli, kurse i plagosuri, Sotiraq Misha, ndodhet në spitalin e Korçës.
Por kësaj historie nuk i vjen fundi këtu!
Kur vëllai i Anri Relit, shkoi në komisariatin e policisë së Korçës për t’u interesuar për fatin e vëllait, u kërcënua nga katër persona, të cilët zbritën nga një makinë tip “BMW”. Ngjarja ka ndodhur në derën e komisariatit të policisë së Korçës.
Në momentin që vëllai i të arrestuarit, pra djali i biznesmenit Reli kërkoi ndihmën e policisë, katër personat që e kërcënuan u larguan me “BMW”-në.
Besohet që mes dy pronarëve që i kanë hotelet ngjitur në malin e Moravës , kanë pasur konflikte të vazhdueshme për burimin nga i cili furnizohen me ujë, ndërsa sot sherri u agravua për shkak të përplasjeve për parkingun.
