E kthyer tashmë në një traditë, Bashkia e Tiranës vazhdon të japë tendera pa garë dhe duke skualifikuar konkurrentët për arsye imediate dhe duke i zhvilluar procedurat vetëm me një konkurrent. Kësaj radhe bëhet fjalë për tenderin e bërë në datën 9 dhjetor nga Drejtoria e Përgjithshme e Rrugëve dhe Ndriçimit Publik Tiranë, e cila është në varësi të Bashkisë së Tiranës, për blerjen e një “Kamioni vetëshkarkues 814”.
Tenderi mban numrin e referencës REF-14471-12-08-2021, ka fondin limit prej 7.235.000 lekë të reja, ose rreth 73 milionë lekë të vjetra. Në këtë procedura kanë marrë pjesë në garë vetëm dy kompani “ONYX” sh.p.k dhe “LIGUS” sh.p.k. Nga gara është skualifikuar kompania “LIGUS” sh.p.k, me arsyen se nuk ka paraqitur me foto llojin e mjeteve dhe se nuk ka deklaruar kilometrat e kamionit, kur kamioni pretendohet të blihet i ri. Kështu me skualifikimin nga gara të “LIGUS” sh.p.k, kompania “ONYX” sh.p.k e cila nuk ka pasur asnjë konkurrent, është shpallur automatikisht fituese në këtë tender. Pra, kompania “ONYX” garoi me veten e saj dhe u shpall fituese.
Kjo është një procedurë tjetër ku shpiken arsye nga më absurdet në mënyrë që tenderët të shkojnë për kompanitë që mund të jenë të paracaktuara. Nuk ka munguar edhe flamuri i kuq nga “Open Data”, ku e shoqëron me mbishkrimin e skualifikimi i të gjithë operatoreve konkurrues përveç fituesit, një procedurë kjo që lejohet nga ligji, por që mbart risk të madh për abuzim, klientelizëm, paracaktim dhe shpeshherë korrupsion.
Por “ONYX” sh.p.k është e njohur pasi është në pronësi të Sahit Dollapit, ish-sekretarit organizativ të në Partinë Demokratike, i cili u largua vetëm dy javë pas zgjedhjeve të 25 prillit. Edhe pse vepronte si sekretar organizativ në PD, Dollapi ka “bashkëpunuar” disa herë më Bashkinë e Tiranës edhe pse drejtohet nga Erion veliaj, ku në shumë tendera kompania e tij është shpallur fituese në disa tendera të Bashkisë Tiranë, pa garë dhe pa konkurrent.
Kujtojmë këtu se një muaj pas dorëheqjes kompania “ONYX” sh.p.k doli fituese në tenderin edhe ky pa garë me vlerë rreth 190 mijë USD, për zhbllokimin e pusetave në Tiranë. Siç duket rezultati i 25 prillit po i shkon më përshtat Sahit Dollapit, pasi duke pasur nga një këmbë në të dyja kampet, doli i fituar ku po vazhdon të merr miliona lekë nga “kundërshtarët” e tij.
Gijotina.com
Discussion about this post