Një aksident i rëndë ndodhi ditën e sotme në bypassin e Orikum-Kaninë, në Vlorë, ku ka humbur jetën shoferi dhe pasagjeri. Policia njoftoi paraprakisht se pasagjeri kishte mbetur nën inerte. Të dy viktimat janë me origjinë nga Kavaja, të moshave 30-35 vjeç.
Ndërkaq të tjera detaje janë zbardhur nga aksidenti i rëndë. Burime nga grupi i hetimit bëjnë me dije se aksidenti dyshohet se ka ndodhur për shkak të shpejtësisë.
Drejtuesi i kamionit së bashku me pasagjerin kishin ngarkuar kamionin me zhavor dhe ishin duke zbritur nga zona e Kaninës për në Orikum.
Nuk dihet nëse ka pësuar defekt apo nuk kanë funksionuar frenat, por drejtuesi i automjetit i cili nga frika se mos dilte nga rruga dhe binte poshtë në humnere është kthyer në mes të rrugës dhe është përplasur me anën e shkëmbit.
Përplasja ka qenë shumë e fortë sa të dy trupat kanë dalë nga xhami i kamionit, dhe ngarkesa me zhavor i ka mbuluar të dy trupat. Zjarrfikësit, policia, por dhe ambulanca ndodhen në vendngjarje.
Discussion about this post