Drejtori i Komunikimit të kryeministrit Edi Rama, Endi Fuga ka reaguar mbi lajmin e dhënë nga mediet britanike, se Shqipëria do të ngrejë një kamp për të pritur refugjatët ilegalë që kthehen pas nga Anglia.
Fuga shkruan në Twitter, se lajmi është i pavërtetë duke hedhur poshtë lajmin se në vend do të ngrihet një qendër azilantësh për llogari të palëve të treta.
“Lajmi se Shqipëria do ngrejë një qendër azilantësh për llogari të palëve të treta është absolutisht i pavërtetë. Shqipëria hapi dyert për 4 mijë afganë e jemi krenarë për këtë. Ne bëjmë detyrat tona karshi traditës e fëmijëve tanë, jo detyrat e atyre që janë më të mëdhenj e më të pasur se ne”, shkruan ai në Twitter.
Më herët, tabloidi britanik “The Sun” shkruante se të gjithë klandestinët që do të kapen në Britaninë e Madhe dhe kërkojnë azil, fillimisht do të sillen në Shqipëri, ku do të ngrihet një qendër pritjeje. Ndërsa autoritetet britanike do të shqyrtojnë kërkesat e tyre, vetë emigrantët do të qëndrojnë në një qendër pritje që do të ngrihej në vendin tonë.
