Kampet e emigrantëve në Shëngjin, Rama miraton nxitimthi në Qeveri marrëveshjen me Italinë

Qeveria ka miratuar në mbledhjen e sotme, 10 ditë pas firmosjes në Romë, marrëveshjen për ngritjen e qendrës pritëse për azilkërkuesit nga Afrika në zonën e Gjadrit. Marrëveshja e firmosur mes Kryeministrit Edi Rama dhe homologos italiane, Giorgia Meloni, parashikon që në qendrën e emigrantëve në Shqipëri të strehohen emigrantët e paligjshëm që do të kapen në brigjet italiane, duke mos përfshirë këtu gratë shtatzëna dhe fëmijët.

Tashmë që qeveria shqiptare miratoi marrëveshjen,e cila ka ndezur debate si në Shqipëri ashtu edhe në Itali, pritet që ajo të kalojë për miratim në Kuvend, ku mjafton një shumicë e thjeshtë votash.

Opozita e ka kontestuar nënshkrimin e kësaj marrëveshjes për mungesën e transparencës por dhe sepse pretendon se është në shkelje të Kushtetutës si dhe marrëveshjes ndërkombëtare.

Kryeministri ka deklaruar se kjo është e para dhe e vetmja marrëveshje e kësaj natyre që nënshkruhet me një shtet të BE-së, edhe pse pranon se nuk kanë munguar kërkesat nga vende të tjera.

Marrëveshja mes dy vendeve do të jetë në fuqi për 5 vite me të drejtë rinovimi. Ajo parashikon që gjatë kësaj periudhe emigrantët që do të transportohen nga Italia fillimisht do të regjistrohen në Portin e Shëngjinit dhe më pas do të vendosen në qendrën e pritjes në Gjadër, e cila ka një kapacitet deri në 3 mijë vende.

Të gjitha shpenzimet si për transportin ashtu dhe rikostruksionin e godinave por dhe ato për kostot ditore si të azilkërkuesve dhe personelit, që do të punojë brenda qendrës së pritjes, do të mbulohen nga qeveria italiane.

RATIFIKIMIN E PROTOKOLLIT, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE QEVERISË SË REPUBLIKËS ITALIANE, PËR FORCIMIN E BASHKËPUNIMIT NË FUSHËN E MIGRACIONIT

Në mbështetje të neneve 78, 83, pika 1, dhe 121, të Kushtetutës, me propozimin e Këshillit të Ministrave, Kuvendi i Republikës së Shqipërisë

V E N D O S I:

Neni 1

Ratifikimin e protokollit, ndërmjet Këshillit të Ministrave të Republikës së Shqipërisë dhe qeverisë së Republikës Italiane, për forcimin e bashkëpunimit në fushën e migracionit, sipas tekstit që i bashkëlidhet këtij ligji.

Neni 2

Ky ligj hyn në fuqi 15 ditë pas botimit në “Fletoren zyrtare”.