16 vite pritje. 16 vite vuajtje dhe sakrificë për të gjithë tifozët dhe lojtarët e Boston Celtics. Më në fund, pas shumë tentativash të dështuara, skuadra nga konferenca e lindjes ia ka dalë të shpallet kampion i NBA për herë të 18-të në historinë e saj, duke u bërë skudra më e titulluar në NBA.
Ishte pikërisht mbrëmja e së hënës, që solli triumfin e të besuarve të Joe Mazzulla.
Në ndeshjen e pestë ndaj Dallas Mavericks, vendasit e Celtics ishin asfiksues për kundërshtarin, teksa dhe nga zjarri i tifozerisë vendase, arritën të mposhtin thellë 106-88 Mavericks dhe të nisnin festen e gjelbër në “TD Garden”. Një sezon plot emocione për Celtics, por në asnjë moment nuk humbën gjakftohtësinë e një sezoni të gjatë, të mbushur me plot sfida të forta.
Jo vetëm vendi i parë në lindje, por edhe forma me të cilën heronjtë e Boston-it, si Tatum, Brown, Holiday e shumë të tjerë, bënë që Celtics të jetë dhe një herë tjetër krenaria e shumë të pasionuarëve pas këtij sporti në SHBA dhe në botë.
Në këto 16 vjet, Boston ka qenë jo pak herë afër titullit kampion në NBA, por herë mungesa e eksperiencës së lojtarëve dhe disa herë edhe mendjemadhësia në disa sfida, penguan sukseset.
Nga ana tjetër ka zhgënjim, por me kokën lart. Dallas Mavericks zhvilloi një nga sezonet më të mira të historisë së saj.
Nuk ishte Dirk Novitzki apo ndonjë protagonist tjetër i 2011-tës, por këta djem treguan se mund të shkojnë shumë larg. Nuk ishin finalet e Mavericks, por ishte një sezon i tërë për Luka Doncic që theu rekorde dhe vetëm rekorde me këtë skuadër.
Shumë pak e prisnin, pavarësisht një sezoni të rregullt impresionues, që Dallas mund të vinte deri në finalet e mëdha. Vendi i pestë në perëndim dhe ndonjëherë edhe ulje-ngritjet nuk bënë që në ekip të kishte vend për eufori.
Sidoqoftë, fituesi nuk gjykohet kurrë dhe kësisoj festa është legjitime për Celtics që fitojnë titullin e 18-të në histori dhe shkëputen sërish me një titull nga rivalët e përjetshëm të Los Angeles Lakers, që në këtë sezon kishin dritëhijet e së shkuarës.
Në Boston do të ketë festë të madhe, kishin shumë që kishin pritur tifozët. Zhgënjimet në vitet e fundit kishin bërë mos kishin shumë entuzaisëm deri në fund, por sot Celtics janë kampion.
Discussion about this post