West Ham nuk po kalon një periudhë të mirë në kampionat. Në Premier League kryeqytetasit renditen në vendin e 20-të dhe janë kokë e këmbë në garën për të evituar rënien nga kategoria. Drejtuesit e klubit i kanë dhënë edhe një shans të fundit trajnerit skocez David Moyes. Në rast dështimi në përballjen ndaj Nottingham Forest, atëherë 59-vjeçarit do t’i tregohet “dera e daljes”.
Trajneri 1 herë fitues i Champions League Rafael Benitez shihet si zëvëndësuesi ideal i Moyes në rast shkarkimi. Aventura e tij e fundit ishte me Everton në vitin 2022 dhe duket se për spanjollin ka ardhur momenti për t’u rikthyer në detyrë.
Në fakt, Benitez nuk ishte zgjedhja e parë e klubitduke qenë se drejtuesit më parë kishte kontaktuar me Mauricio Pochetinon dhe Thomas Tuchel, por si argjentinasi ashtu edhe gjermani refuzuan londinezët. Një tjetër alternativë që e njeh mirë Premier League ishte Nuno Espirito Santo.
Portugezi ishte gati për një rikthim në Premier League, por aktualisht është i impenjuar në Arabi me Al-Ittihad dhe në rast se shkëputej kontrata atëherë West Ham do të duhej të paguante deri në 6 milionë paund. Ndaj, alternativa e vetme mbeti Benitez i cili tashmë pret duelin e radhës me Moyes që nga ana tjetër do të mundohet të shpëtojë postin e tij.
Discussion about this post