Operacioni “Seman” i policisë së Fierit ka vënë në pranga katër persona për prodhim dhe shitje narkotikësh. Sipas burimeve, janë arrestuar Gersi Zika, 34 vjeç, banues në Tiranë, Arsen Meta(Bajramaj), 29 vjeç, banues në Ballsh, Jozo Kozmaj, 25 vjeç, banues në Topojë, Fier, dhe Anxhelo Doçia, 23 vjeç, banues po në Topojë, Fier.
Të rinjtë u kapën në flagrancë gjatë operacionit në Bypass-in e Fierit, me automjetet tip “Audi” dhe “Citroen”, ku policia pas kontrollit vuri re që posedonin lëndë narkotike cannabis sativa që e kishin bërë gati për shitje.
Në cilësinë e provës materiale u sekuestruan 4 kg lëndë narkotike cannabis sativa, 2 automjetet dhe 5 aparate celularë. Ndërkohë, po vijon puna për identifikimin dhe kapjen e personave të tjerë që mund të jenë të përfshirë në këtë veprimtari kriminale.
Materialet procedurale do t’i kalojnë Prokurorisë pranë Gjykatës së Shkallës së Parë Fier, për veprime të mëtejshme.
Discussion about this post