Gjykata Penale e Tiranës ka vendosur masën e sigurisë “arrest me burg” për 3 ushtarakët e arrestuar, pas zbulimit të rreth 125 bimëve narkotike në repartin ushtarak të Zall Herrit.
Tre ushtarakët e arrestuar janë:
– Gramoz Mullai, 52 vjeç, me detyrë Shef Seksioni i Sigurisë;
– Rustem Koci, 25 vjeç, me detyrë Specialist për Zbulimin;
– Gentian Zhurda, 45 vjeç, me detyrë Specialist Sigurie.
Ata akuzohen për shpërdorim detyre.
Sipas raportimeve, gjatë përballjes në Gjykatë, 3 të arrestuarit kanë ngritur pretendimin se është e pamundur të kontrollohet një sipërfaqe prej 140 ha, ndërsa për vështirësitë kanë vënë në dijeni edhe eprorët e tyre në atë që njihet si reparti special i Forcave të Armatosura.
Zona ku u gjetën të kultivuara bimët narkotike është pranë një rezervuari ccka duket se personat që kanë kultivuar bimët narkotike kanë menduar edhe për ujitjen.
Pas zbulimit të bimëve narkotike të kultivuara brenda perimetrit të sigurisë së Repartit Ushtarak, u vendos masa e pezullimit nga detyra të 7 personave, personel në këtë repart, 3 prej të cilëve u arrestuan.
Mësohet se rrënjët e kanabisit janë zbuluar nga avioni i Guardia di Finanza që monitoron territorin shqiptar. Bimët ishin rritur dhe janë pikasur menjëherë nga pajisjet e italianëve që kanë sinjalizuar policinë shqiptare.
Kanabisi ishte mbjellë në një zonë që përdoret për stërvitjen 10 ditore të ushtarëve që bëhen pjesë e forcave komando. Si pjesë e testit është braktisja në një zonë të pyllëzuar, ku ushtarët duhet të mbijetojnë për disa ditë në kushte të vështira, duke u ushqyer me bimësinë e zonës dhe duke siguruar ujin nëpërmjet teknikave të caktuara.
Discussion about this post