Kancelarja Merkel hapi panairin tregtar të automobilave dhe transportit IAA në Mynih me një vizitë. Gjermania duhet të vazhdojë të jetë një vend i rëndësishëm për prodhimin e automjeteve, shpjegoi Merkel. Transformimi në lëvizshmëri neutrale ndaj klimës ka të bëjë me ruajtjen e vendeve të punës në Gjermani.
Panairi Ndërkombëtar i Automjeteve u hap këtë vit nën moton e lëvizshmërisë neutrale ndaj klimës. Në fjalën e saj të fundit si kancelare në IAA, Merkeli tha se është e kënaqur që industria tani ka pranuar në mënyrë të vazhdueshme sfidën e zhvillimit të lëvizjeve alternative.
“Unë jam e kënaqur që tani është e qartë se tendenca është qartësisht drejt elektromobilitetit,” tha Merkeli në ceremoninë e hapjes. Katër vjet më parë kishte kryesisht studime e koncepte, dy vjet më parë erdhën modelet e para, por tani praktikisht të gjithë prodhuesit kanë “automjete elektrike të përditshme” në gamën e tyre të produkteve.
Merkeli vuri në dukje se këtë vit u arrit objektivi për të pasur një milion automjete elektrike të regjistruara në Gjermani. Ajo theksoi se zgjerimi i infrastrukturës për furnizimin me energji të këtyre automjeteve duhet të përmirësohet dhe njoftoi për këtë qëllim një ndihmë deri në shtatë miliardë euro. Kancelarja i bëri më tej thirrje industrisë të përdorë potencialin e hidrogjenit ose lëndëve djegëse sintetike.
Shndërrimi është një “detyrë herkuliane”
Presidentja e Shoqatës së Industrisë së Automjeteve (VDA), Hildegard Müller, theksoi se angazhimi i industrisë së automjeteve për neutralitetin ndaj klimës nuk diskutohet. Industria është “pa diskutim” në mbështetje të objektivit qëllimin e neutralitetit ndaj klimës. Sidoqoftë, shndërrimi është një “detyrë herkuliane” që nuk duhet nënvlerësuar. Suksesi varet nga kushtet e përgjithshme: “Taksat më të larta, kostot edhe më të larta të energjisë janë mënyra e gabuar për të aktivizuar fuqinë ekonomike,” tha Müller.
Müller theksoi se politika duhet të sigurojë që të ketë mjaft energji elektrike të gjelbër dhe t’u japë kompanive paratë që u nevojiten për konvertimin.
Edhe kryeministri bavarez Markus Söder (CSU) theksoi rolin e industrisë së automobilëve në luftën kundër ndryshimit të klimës. Sidoqoftë, kjo është e mundur vetëm përmes përparimit teknik, dhe industria e automobilave është një “përcaktuese e tendencës” në këtë fushë. “Automjetet do të jenë absolutisht të nevojshme për vendin tonë në të ardhmen,” tha Söder.
Më parë Markus Söder ishte shprehur se i kënaqur që panairi po zhvillohet – dhe falenderoi për këtë Angela Merkelin. “Ne e kemi nxjerrë vendin mirë nga kriza”, tha ai. Ky ishte parakushti që IAA të zhvillohej.
Söder shtoi se është i kënaqur që është zgjedhur Mynihu si vend për panairin e IAA. “Automjetet po vijnë në shtëpi,” tha Söder, duke shkaktuar buzëqeshje në sallë.
Merkeli theksoi rëndësinë e automjeteve për lëvizjen individuale
Kryeministri i Bavarisë kujtoi më tej rëndësinë ekonomike të industrisë së automobilave. Rreth 30 përqind e prodhimit ekonomik në Bavari vjen nga industria e automobilave. Ky sektor është “zemra e ekonomisë gjermane”, tha politikani i CSU.
Në fjalën e saj, Merkeli theksoi rëndësinë e automjeteve për lëvizjen individuale. “Edhe nëse IAA 2021 e kupton dhe paraqet lëvizjen në tërësi, sigurisht që automjetet do të vazhdojnë të jenë fokusi”, tha ajo.
Ndër të tjera, panairi do të përqëndrohet në rrjetëzimin e mënyrave të ndryshme të transportit. Për herë të parë, në mesin e ekspozuesve janë disa kompani nga industria e biçikletave.
Aktivistët e klimës e akuzuan IAA për mungesë kredibiliteti dhe bllokuan në mëngjes shumë autostrada rreth vendit me aksione proteste. Gjatë protestave, ambientalistët paralizuan përkohësisht trafikun në autostradat rreth Mynihut. Sipas policisë, demonstruesit shpalosën në disa autostrada parulla. Disa prej tyre u lëshuan me litar nga urat për ta bërë këtë. Demonstrata u mbajtën edhe para vendit ku po mbahet panairi. Aktivistët shpjeguan se qëllimi ishte ndërgjegjësimi i publikut për rrezikun e gjithëpranishëm të krizës klimatike. /DW
