Zbardhen dëshmitë Luan Malasit dhe Iljaz Ismailit, të cilët u denoncuan në polici dy ditë më parë për kanosje dhe dhunë nga Arbër Liço.
Në dëshmitë që kanë dhënë në polici Malasi dhe Ismaili kanë deklaruar se konflikti mes tyre dhe Liços ka filluar për shkak të një parkimi në vijat e bardha në hyrje të qytetit të qyteti të Kuçovës. Iljaz Ismaili, një nga agresorët, person me precedentë të mëparshëm penal brenda dhe jashtë vendit tha se pasi janë sharë me fjalë, ata janë konfliktuar me duar me njëri-tjetrin dhe se Arbër Liço ka qëlluar me grusht 61-vjeçarin Luan Malasi dhe më pas është larguar me makinë drejt banesës së tij. Sipas Ismailit, ata kanë shkuar në banesën e Liços për t’u sqaruar dhe jo për t’u konfliktuar sërish.
Nga ana tjetër edhe Luan Malasi ka deklaruar në polici se pasi kanë shkuar në banesën e Liços, ky i fundit i ka sharë dhe kërcënuar. Në këto rrethana ata janë përleshur me sende të forta me njëri-tjetrin. Luan Malasi dhe Iljaz Ismaili kanë deklaruar se ata nuk kanë pasur asnjë njohje apo konflikt të mëparshëm me Liçon dhe se gjithçka mes tyre ka filluar për shkak të një konflikti të çastit, por që më pas ata pretendojnë se nëpërmjet një telefonate i kanë kërkuar falje.
Malasi dhe Ismaili kanë deklaruar se, gjithçka që ndodhi është inskenuar më pas nga Liço, që i ka denoncuar në polici me qëllim për të pasur lehtësira në ndonjë shtet të Bashkimit Europian për të kërkuar azil ,me pretendimin se ai dhe familja e tij ndihet e kërcënuar.
34-vjeçari Arbër Liço nga Kuçova denoncoi dje me emra në media disa persona, që sipas tij i kishin shkuar në banesë, e kanë kërcënuar me jetë dhe dhunua. Liço ka kërkuar që policia të marrë në mbrojtje familjen e tij.
