Kërcënohet me armë zjarri 32-vjeçari në Laç. Ngjarja ka ndodhur mesnatën e së dielës në Lagjen nr.6, ndërsa nën shënjestrën e sulmit ishte 32-vjeçari Sandër Deda.
Deda ka qenë duke lëvizur me automjetin e tij në drejtim te banesës, kur është kanosur me armë nga disa persona që vinin me një mjet në drejtim të kundërt me të, duke qëlluar në ajër. Menjëherë pas thirrjes të marrë nga 32-vjeçari, policia është nisur në vendngjarje dhe, nga veprimet paraprake ka rezultuar që nuk ka lëndime shtetasi Sandër Deda, si dhe nuk ka dëmtime as makina që po udhëtonte.
Brenda një kohë të shpejtë, policia ka arritur të identifikojë dhe të shpallë në kërkim autorët e dyshuar të ngjarjes, por për shkak të hetimeve, nuk zbulohen identitetet e tyre. Policia vijon punën intensive me forca policore në terren, duke ushtruar kontrolle, si dhe duke vlerësuar çdo informacion për kapjen e tyre, ndërsa motivet e ngjarjes mbeten të pazbuluara.
Sandër Deda nuk rezulton të jetë person me precedentë penalë, ndërkohë hetimet vijojnë për të zbuluar nëse 32-vjeçari që denoncoi ishte objektiv i përcaktuar, apo u gjend në rrugën e gabuar përballë një grupi personash të armatosur.
Discussion about this post