Policia italiane ka arrestuar këtë të hënë 14 persona pas një epsiodi dhune që shpërtheu në një qendër ndalimi për emigrantët pranë Romës.
Trazirat në qendrën e emigrantëve nisën pas vetëvrasjes së një të riu që po mbahej atje.
Dy oficerë policie dhe një ushtar mbetën të plagosur nga trazirat e së dielës ku emigrantët arritën të dilnin me forcë në një parking makinash, duke i vënë flakën dyshekëve dhe duke hedhur objekte të forta drejt policisë.
Oficerët përdorën gaz lotsjellës për të rifikuar kontrollin e objektit Ponte Galeria, një qendër mbajtjeje për migrantët pa dokumente, e cila është afër aeroportit kryesor të qytetit në Fiumicino.
Dhuna shpërtheu pas zbulimit të trupit të pajetë të një 21-vjeçari nga Guinea, i cili ishte vetëvrarë.
Koalicioni i Italisë për Lirinë dhe të Drejtat Civile (CILD) tha se emigrantëve të mbajtur në qendra të tilla po u mohohet qasja në kujdesin e duhur shëndetësor dhe mbrojtjen ligjore.
Sindikatat e policisë u ankuan se siguria në kamp ishte e pamjaftueshme dhe kishin frikë nga pasoja më të rënda në të ardhmen.
“Qendrat e riatdhesimit janë bomba reale me sahat,” tha Fabio Conesta, sekretar i përgjithshëm i sindikatës së oficerëve të policisë.
Ballafaqimi me migracionin është një sfidë e madhe për qeverinë e kryeministres Giorgia Meloni, e cila premtoi një partneritet të ri me Afrikën në një samit javën e kaluar.
Rreth 157,600 emigrantë me varka arritën në Itali vitin e kaluar, numri më i madh që nga 2016, duke minuar premtimin elektoral të Melonit për të ndalur fluksin e mbërritjeve të paautorizuara.
Discussion about this post