Reshjet e dendura të shiut këtë të mërkurë, kanë krijuar kaos në qytetin bregdetar të Durrësit. Janë dashur vetëm pak orë reshje që rrugët të kthehen në lumenj, e si pasojë, uji të vërshojë edhe në banesa.
Duke monitoruar terrenin, Ministria e Mbrojtjes bën të ditur se rastet po trajtohen nga strukturat përkatëse, ndërsa një eskavator i Drejtorisë së Ujitjes dhe Kullimit ka mbërritur në Kanalin e Ujërave të Larta për ndërhyrje dhe pastrimin e kanaleve.
Po ashtu raportohet se ka rritje të nivelit të ujit në rrugë, duke shkaktuar vështirësi në qarkullimin e mjeteve dhe lëvizjen e këmbësorëve si dhe prani të ujit në disa zona të qytetit si dhe në Shkozet, Ish-magazinat e Agrotransportit, Zona e Plazhit, Ish-Këneta, Stadiumi dhe Lagja “17 Nëntori”.
Po ashtu, ka prani të ujit edhe në sipërfaqe bujqësore në njësinë administrative Sukth. Strukturat vendore janë angazhuar për të riparuar pasojat e krijuara dhe po punojnë intensivisht për të menaxhuar situatën.
Agjencia Kombëtare e Mbrojtjes Civile do të vijojë të ndjekë situatën, për të koordinuar forcat deri në normalizimin e situatës.
Discussion about this post