Përplasja që nisi në Kuvend për mënyrën e organizimit të mbledhjeve të Komisioneve Parlamentare ka shkaktuar kaos dhe çorganizim total në mbledhjen e parë të disa prej tyre.
Komisioni i Ligjeve, ai i Shëndetësisë, i Sigurisë dhe ai i Jashtëm kishin planifikuar mbledhjet nga ora 10:30 deri në orën 13:30. Edhe pse Kuvendi kishte njoftuar ditën e djeshme se mbledhja do të bëhej online, deputetët e PD-së, të cilët janë anëtarë të këtyre komisioneve, duke qenë se ishin kundër propozimit, që gjatë diskutimit në seancën plenare, vendosën të jenë të pranishëm fizikisht në sallat e kryesisë së Kuvendit me një numër të reduktuar anëtarësh ose me certifikatë vaksinimi apo test Covid-19.
Por kjo mospërputhje mes mazhorancës dhe opozitës shkaktoi kaos në këto mbledhje, ku veç përplasjes mes tyre nuk u arrit të kuptohet asgjë nga publiku i gjerë. Të parët që mbërritën në Kuvend nga deputetet e PD-së janë Oerd Bylykbashi, Dhurata Çupi Tyli, Bledjon Nallbati, Elda Hoti dhe më pas Sekretari i Përgjithshëm i PD, Gazment Bardhi me deputetët Sajmir Korreshi e Dashnor Sula, ndërkohë që mbledhja e parë e planifikuar ishte ajo e Komisionit të Ligjeve, e cila mbaroi pa nisur mirë.
Socialistët ishin të loguar online për të marrë pjesë në komision, ndërkohë që e kundërta ndodhi me deputetët e opozitës. Këta të fundit patën një debat me kryetaren e Komisionit, Klotilda Bushka. Ata ishin të pranishëm në sallën e Kuvendit, ndërkohë që online zhvillohej mbledhja.
Po e njëjta histori ka ndodhur edhe me Komisionin e Shëndetësisë, ku Kuvendi i Shqipërisë dhe TVSH me urdhër ndërprenë transmetimin e mbledhjes, pavarësisht se të dy këto institucione paguhen nga taksat e shqiptarëve. Deputetët e opozitës thanë se mbledhja, e cila kryesohet nga Albana Vokshi u ndërpre në momentin kur po tregoheshin dy fotografi që kishin të bënin me maxhorancën. Albana Vokshi tha se opozita ka kërkuar që mbledhja të zhvillohet me prani fizike, ndërsa mazhoranca nga krahu tjetër, ka kërkuar që mbledhja të zhvillohet online. Nëpërmjet kësaj rruge, Vokshi thotë se mazhoranca po tenton të minojë fjalën e lirë të opozitës. Më tej, PD denoncoi se Kuvendi i Shqipërisë fshiu nga faqja mbledhjen e Komisionit të Shëndetësisë, të drejtuar nga opozita.
Ndërkohë, Komisioni i Sigurisë është mbajtur gjithashtu online sipas vendimit të Konferencës së Kryetarëve. Edhe në këtë mbledhje deputetët e PD janë futur në sallë dhe kanë debatuar. Madje ata kanë mbajtur 1 minutë heshtje për efektivin Saimir Hoxha të vrarë në Lezhë, por deputetët e mazhorancës nuk vepruan njësoj, specifikisht kryetari i komisionit të Sigurisë Nasip Naço, i cili refuzoi të ngrihet në këmbë. Noka e cilëson këtë si frikë ndaj opozitës teksa garantoi se PD do të bëjë gjithçka për të rikthyer debatin në komisione dhe parlamentarizmin.
