Kotrolli i Lart i Shtetit ka nxjerr raportin e auditimit për procesin e rindërtimit. Në gjetjet e raportit janë disa shkelje nga ana e Ministrisë së Shtetit për Rindërtimin, si miratimi i programeve të procesit të rindërtimit ka shfaqur mangësi në drejtim të dokumentimit të saj.
Gjithashtu në raport thuhet se njësitë vendore nuk kanë dokumentuar plotësisht numrin e personave që kanë nevojë për trajtim, që kanë humbur familjet nga tërmeti apo janë të pastreh, nuk është dokumentuar plotësisht.
“Veprimtaria e MSHR-së për ndjekjen dhe bashkërendimin e veprimtarisë së ministrive dhe të institucioneve të tjera, publike e shtetërore, për hartimin dhe miratimin e programeve të procesit të rindërtimit ka shfaqur mangësi në drejtim të dokumentimit të saj;
– Mungon në mënyrë të dokumentuar evidentimi i burimeve të brendshme, materiale dhe njerëzore, që disponojnë institucionet, publike e shtetërore, dhe përcaktimin e mënyrës së përdorimit të tyre;
– Ndjekja e zbatimit të përgjegjësive dhe të detyrave të ngarkuara për njësitë e vetëqeverisjes vendore, për trajtimin e shtetasve që kanë humbur familjarët dhe/ose kanë mbetur të pastrehë nuk është dokumentuar plotësisht;
– Ndjekja e zbatimit të përgjegjësive dhe të detyrave të ngarkuara për strukturat e posaçme, të ngritura me ligj apo vendim, për përballimin e pasojave të shkaktuara nga tërmeti është karakterizuar nga rutina e përditshme, pa e dokumentuar atë plotësisht;
– Informacionet mbi mënyrën e përdorimit dhe eficencën e arritur për çdo donacion apo mbështetje të ofruar nga organizatat shtetërore dhe organizmat kombëtarë e ndërkombëtarë etj., janë të pa plota;
– Dokumentimi i burimeve të brendshme, njerëzore, që disponojnë institucionet, publike e shtetërore ka shfaqur mangësi në evidentim” – thuhet në raportin e KLSH.
Më tej raporti ka evidentuar edhe mangësitë e Komisionit Shtetëror i Rindërtimit, pasi nuk ka hartuar dhe miratuar Programin e përgjithshëm të rindërtimit, dokument mbi të cilin do të mbështetej procesi i rindërtimit. Mangësi tjetër është edhe mungesa e monitorimit të mirëfilltë dhe periodik të procesit të rindërtimit, e cila nuk siguron transparencë mbi rezultatet e masave të ndërmarra pas tërmetit.
Komisionit Shtetëror i Rindërtimit gjithashtu ka dërguar dy projekte jo në respektim të procedurave të përcaktuara për përfitimin nga grantet e rindërtimit, siç është projekti për rindërtimin e Urës së Tapizës dhe projekti për rindërtimin e QSHAMT ku kërkesat për realizimin e këtyre projekteve nuk janë mbështetur në akt-ekspertiza.
“- Nuk ka hartuar, miratuar dhe përcjellë për miratim Programin e përgjithshëm të rindërtimit, dokument mbi të cilin do të mbështetej procesi i rindërtimit. Mungesa e këtij dokumenti të miratuar nga KSHR dhe KM, përmban riskun e cenimit të efektivitetit, eficiencës, dhe ekonomicitet të procesit të rindërtimit, si rezultat se vendimmarrja nuk është mbështetur mbi një planifikim të mirëfilltë, por është kryer rast pas rasti;
– Nga ana tjetër, mungesa e monitorimit të mirëfilltë dhe periodik të procesit të rindërtimit nga KSHR, si dhe mungesa e raporteve (nga KSHR) për KM-në, nuk ofron siguri mbi performancën e procesit të rindërtimit, përmban riskun e mos marrjes në kohë të masave të nevojshme për përmirësim, si dhe nuk siguron transparencë mbi rezultatet e masave të ndërmarra deri më tani për përballimin e situatës së krijuar nga tërmeti i nëntorit 2019;
– Sekretariati Teknik i Komisionit Shtetëror të Rindërtimit gjatë veprimtarisë së tij për marrjen e vendimeve, nuk rezulton të ketë dokumentacion vërtetues për kryerjen e njoftimit dhe dërgimit të materialeve, procesverbalet e mbajtura nuk pasqyrojnë votën kundër, vendimet dhe procesverbalet e mbledhjeve të KSHR nuk janë nënshkruar të gjithë anëtarët etj.;
– Gjithashtu rezultoi se, janë pranuar, miratuar me Vendim të KSHR dhe dërguar për miratim tek KM dy projekte, jo në respektim të procedurave të përcaktuara për përfitimin nga grantet e rindërtimit: projekti për rindërtimin e Urës së Tapizës me fondin e propozuar në vlerën 151,539,896 lekë pa TVSH, dhe projekti për rindërtimin e QSHAMT me fondin e propozuar prej 275 milion lekë, pasi kërkesat për realizimin e këtyre projekteve nuk janë mbështetur në akt-ekspertiza apo projekt preventiv punimesh” – thuhet në Raportin e KLSH.
