PSG është një klub ku çdo gjë është si një ‘kaos i organizuar’. Kemi të bëjmë me skuadrën që pavarësisht fitimit të titullit kampion në Francë, ka dështuar totalisht në objektivat primarë të sezonit, njëri prej tyre, fitimi i UEFA Champions League, me parisienët që u eliminuan, ‘pa shumë luftë’, nga Bayerni i Mynihut.
Blerja e argjentinasit Lionel Messi, pritej që të sillte trofeun e shumëpritur, nën hijen e Kullës Eifel, por realiteti doli krejt ndryshe. Pavarësisht se mediat e ndryshme, ‘e pikturojnë’, si meritë të Messit, fitimin e një kampionati që PSG e fitonte më parë, me lehtësi, dhe me lojtarë si Cavani, Matuidi dhe Ibrahimovic, e vërteta është se tifozët kanë mbetur shumë të zhgënjyer nga rezultatet e skuadrës.
Interesimi për fitimin e titullit të Ligue 1, ishte pothuajse 0, nga tifozët, me delegacionin e klubit, që u prit në aeroport nga vetëm 3 tifozë (të cilët, kontestuan skuadrën).
Megjithatë, nuk mbaron këtu, sepse përsa i përket vetë lojtarëve, njëri nga “yjet” e skuadrës, vendosi të injoronte komplet ndeshjen e skuadrës së tij, për tekat e veta.
Ai është braziliani Neymar, i cili preferoi të merrte pjesë në një turne pokeri dhe në Grand Prix të Monacos, në vend që të festonte titullin me shokët e tij të ekipit.
Duket që Neymar, e ka ndarë mendjen për të ikur nga Parisi, me klubet e Premier League që pritet të kontraktojnë brazilianin.
Discussion about this post