Ambasada e Mbretërisë së Bashkuar në Tiranë i ka drejtuar një apel mazhorancës dhe opozitës në parlament që të punojnë bashkarisht për të garantuar që Parlamenti të ushtrojë rolin e tij mbikqyrës.
Reagimi i Ambasadës britanike vjen në një kohë kur prej rreth 1 muaji opozita proteston në Kuvend duke bllokuar zhvillimin normal të seancave plenare dhe Komisioneve Parlamentare.
Gjithashtu lidhur me kaosin në Kuvend ka reaguar edhe ambasada e SHBA, duke u shprehur “e shqetësuar për zhvillimet e fundit në parlamentin e Shqipërisë”.
Në përgjigje të interesit të Zërit të Amerikës, për një koment mbi këto zhvillime, të cilat prej disa javësh kanë bërë të pamundur aktivitetin normal të organit ligjvënës të vendit, ambasada amerikane vë në dukje se “një parlament funksional dhe dialogu midis përfaqësuesve të tij, janë me rëndësi kritike për t’u ofruar shërbime dhe hartuar ligje në interes të popullit shqiptar”.
Ambasada nënvizon më tej se “mosfunksionimi i përsëritur i vërejtur gjatë muajve të fundit nuk është në interes të Shqipërisë”.
Mazhoranca socialiste e Kryeministrit Edi Rama ka zgjedhur të përdorë gardën për të vendosur rregull në Kuvend, duke i vendosur trupat gardiste si një mur mes ligjvënësve opozitarë dhe karrigeve ku qëndrojnë ministrat dhe Kryeministri.
Reagimi i Ambasadës britanike
Ambasada Britanike në Tiranë shpreh shqetësimin lidhur me zhvillimet më të fundit në Parlamentin e Shqipërisë.
Një parlament që funksionon dhe dialogu konstruktiv mes përfaqësuesve të zgjedhur janë thelbësorë për të garantuar legjislacionin dhe shërbimet në mënyrë efektive.
U bëjmë thirrje shumicës dhe opozitës të punojnë së bashku për të garantuar që parlamenti të mund të ushtrojë rolin e tij mbikëqyrës dhe të veprojë në interesin e të gjithë qytetarëve.
Discussion about this post