Kapet 1 ton kokainë në Ekuador, mediat: Ja roli i shqiptarëve në “botën e krimit”

Një sasi e madhe droge, rreth 1 ton kokainë, është kapur në Portin e Guayaquil, në Ekuador.

Mediat në vendin amerikano-latin shkruajnë se gjatë një operacioni, u gjet një kontejner me 432 kuti kallamarësh të mbushur me drogë.

Pas analizave të kryera, u konfirmua zbulimi i 1294 zarfave me hidroklorur kokaine, të cilat u zbuluan në një kontenier transporti me kallamar të ngrirë. Lëndët fshiheshin në çatinë e kontejnerit dhe në mes të produktit detar me qëllimin për ta fshehur pas erës karakteristike të kallamarit.

Bazuar në një hetim të fundit rezulton që mafia shqiptare kontrollon rrugët e paligjshme të kontrabandës së kokainës dhe madje ka ngritur “shkolla vrasëse” në qytet, duke rekrutuar fëmijë deri në 10 vjeç. Ndaj dyshimet janë se droga u përkiste pikërisht shqiptarëve që drejtojnë trafikun e kokainës nga Guayaquil në drejtim të Antuerpit.

Destinacioni i mallit të konfiskuar ishte Mbretëria e Belgjikës. Njësitë e inteligjencës dhe Qendra Rajonale e Trajnimit të Qenve gjithashtu morën pjesë në operacion. “Të dielën, më 9 tetor, një qen antidrogë gjeti 1294 pako me kokainë në ngarkesën me kallamar”, bëjnë me dije mediat vendase. Pesha totale e drogës ishte 1.5 ton, ekuivalente me 13 milionë doza, tha koloneli Milton Montalvo Calderón, zëvendës komandant i Distriktit 8, i cili përfshin kantonet Guayaquil, Durán dhe Samborondón.

Gjatë një operacioni tjetër është arrestuar një person me 120 pako me hidroklorur kokaine. Pesha totale e alkaloidit është 304 paund, e barabartë me 1.2 milion doza. Gjithsej 154 ton ose 340 mijë paund drogë, barazim me 1.4 miliardë doza, janë sekuestruar në të gjithë vendin që nga 1 janari i këtij viti.