Kapet 30-vjeçari/ Në Shqipëri ishte dënuar me mbi 3 vjet burg, në Itali punonte kamarier

Në Shqipëri, autoritetet e drejtësisë e kishin shpallur në kërkim ndërkombëtar, ndërsa në Itali punonte si kamarier në një lokal, pjesë e një hoteli.

Sipas raportimeve, policia italiane arrestoi 30-vjeçarin shqiptar në qytezën Riva del Garda, pasi ndaj tij ishte në fuqi një urdhër arresti ndërkombëtar për shitje droge.

Ai ishte dënuar nga Gjykata e Tiranës me 3 vjet e 4 muaj burg dhe ishte shpallur në kërkim ndërkombëtar.

Mësohet se gjatë kësaj kohe 30-vjeçari punonte si kamerier në një hotel italian, aty ku edhe u arrestua nga policia.

Ai u dërgua në burgun e Spini di Gardolo, ndërsa pret ekstradimin drejt Shqipërisë për të vuajtur dënimin.