Policia e Tiranës ka arrestuar 30-vjeçarin Haxhi Nezaj në zonën e Kombinatit, pasi u kap në flagrancë duke lëvizur me një armë zjarri me silenciator, të gatshme për qitje. Arrestimi u bë gjatë operacionit të koduar “Punishtja”, të organizuar nga Komisariati Nr. 6 në bazë të informacioneve operative.
Gjatë kontrollit fizik dhe në banesën e tij, efektivët gjetën dhe sekuestruan një armë tjetër zjarri të tipit pushkë, municion luftarak, doza kokaine si dhe sende të tjera të kundraligjshme.
Në vijim të veprimeve, pranë banesës së Nezajt u zbulua një punishte që dyshohet se përdorej për prodhimin e silenciatorëve për armë të ndryshme, të cilat më pas ai dyshohet se ua shiste personave të përfshirë në veprimtari kriminale, përfshirë krime kundër personit dhe pronës.
Discussion about this post