Një operacion i përbashkët i Policisë Kufitare dhe Doganës në pikën kufitare të Morinës ka çuar në sekuestrimin e një sasie të konsiderueshme mallrash kontrabandë dhe arrestimin e dy shtetasve.
Gjatë kontrollit rutinë të dy automjeteve në dalje të territorit shqiptar, autoritetet zbuluan mallra të ndryshme të futur në mënyrë të paligjshme, me një vlerë totale që kap shifrën e rreth 54.3 milionë lekëve.
Nga kontrolli fizik i automjeteve u sekuestruan:
-
930 kilogramë duhan
-
Mbi 1000 kuti me medikamente
-
41,000 tableta farmaceutike
-
2,194 aparate celularë
Në përfundim të veprimeve hetimore, u arrestuan në flagrancë drejtuesit e dy automjeteve:
B.L., 52 vjeç dhe F.M., 55 vjeç, të dy banues në Kukës, të cilët akuzohen për veprën penale të kontrabandës me mallra të akcizës dhe mallra të tjera.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
Policia Kufitare thekson se kontrollet intensive në pikat kufitare do të vijojnë, në kuadër të përpjekjeve për të parandaluar aktivitetet kriminale ndërkufitare dhe për të garantuar sigurinë dhe ligjshmërinë në territorin shqiptar.
Discussion about this post