Kapet me 222 doza kokainë, arrestohet shpërndarësi i drogës në Vlorë (Emri)

Policia e Vlorës, pas një hetimi 3-mujor, ka arrestuar një 45-vjeçar, i cili dyshohet për shpërndarjen e drogave të forta në qytetin bregdetar.

Në kuadër të operacionit të koduar “White Snow” (Dëbora e Bardhë) është vënë në pranga shtetasi Albert Bani, banues në Vlorë. Ndaj tij, Gjykata e Vlorës, me vendimin e datës 4 Mars 2025, i ka caktuar masën e sigurisë “Arrest në burg”, për veprën penale “Prodhimi dhe shitja e lëndëve narkotike”.

“Gjatë hetimeve, shërbimet e Policisë siguruan prova të mjaftueshme për përfshirjen e këtij shtetasi në shpërndarjen e lëndëve narkotike të llojit kokainë në zona të ndryshme të qytetit të Vlorës. Nga kjo veprimtari kriminale, 45-vjeçari ka përfituar shuma të konsiderueshme parash, të cilat dyshohet se i ka gjeneruar nga shitja e dozave të kokainës.

Gjithashtu, gjatë operacionit, shërbimet e Policisë kryen kontroll në banesën e tij, ku gjetën dhe sekuestruan në cilësinë e provës materiale: 222 doza kokainë, 1 peshore elektronike, e përdorur për ndarjen e dozave, 2 aparate celularë, dhe 1 automjet.” – thuhet në njoftimin e Policisë.

Blutë e Vlorës thonë se në bashkëpunim me Prokurorinë, po vijojnë hetimet për dokumentimin e plotë të kësaj veprimtarie kriminale dhe identifikimin e personave të tjerë të përfshirë.