Një person është arrestuar nga policia në Rrëshen, që ka sekuestruar mina me telekomandë, armë zjarri dhe municion. Në pranga u vu Arili Kalija, 45 vjeç, lindur në Thumanë të Krujës.
Aksioni për ndalimin e tij i koduar “Safe City 2”, sipas policisë, erdhi bazuar në inteligjencën policore se një shtetas po transportonte mina me telekomandë, në drejtim të Rrëshenit.
Kalija u ndalua në hyrje të qytetit. Gjatë kontrollit fizik të ushtruar ndaj tij, Policia njofton se gjeti dhe sekuestroi: 4 mina me telekomandë të lidhura me aparat celular me lëndë të dyshuara eksplozive; 3 kallëpe lënde të dyshuar eksplozive me kapsollë dhe fitil; 3 kapsolla të lidhura me fitil; 2 kallepë të tjera lënde të dyshuar eksplozive.
“Në vijim të veprimeve, gjatë kontrolleve në banesën e vjetër të babait të shtetasit të arrestuar, në Lurë, Dibër, shërbimet e Komisariatit të Policisë Mirditë, në bashkëpunim me Policinë e Dibrës, gjetën në banesë 2 armë zjarri, lëndë eksplozive si ajo që ishte montuar në minat me telekomandë, 10 ndezësa granatash ofensive/defensive, 10 kapsolla detonatore, dhjetëra metra fitil zjarrpërcjellës, si dhe qindra fishekë luftarak”, thuhet më tej në njoftimin e bluve.
Hetimet vijojnë për identifikimin dhe arrestimin e personave të tjerë të përfshirë në këtë veprimtari kriminale.
Discussion about this post