Prokuroria e Sarandës ka zbuluar të dhënat të tjera lidhur me hetimet për sasinë prej 35 kg marijuanë të sekuestruar në 6 tetor në një banesë në Konispol, ku u arrestuan çifti Lutfi e Shano Faslliu (Demce).
Prokuroria ka bërë këqyrjen e telefonit tip “Samsung” celular që i përket, Lutfi Faslliu në datën 7 tetor të këtij viti, nga ku kanë rezultuar të dhëna me interes për hetimin, konkretisht mesazhe të dërguara në rrjetet e komunikimit në aplikacionet WhatsApp dhe Messenger drejt disa numrave të ndryshëm shqiptarë ose grekë, ku në përmbajtje të bisedave evidentohet fakti i transportimit të lëndës narkotike drejt shtetit grek.
Gjithashtu sipas Prokurorisë së Sarandës, është bërë kryerja e aktit të ekspertimit teknik-kompjuterik në lidhje me telefonin e sekuestruar të Faslliut, me qëllim zbulimin e më shumë të dhënave të cilat mund të jenë fshirë nga i dyshuari.
Kujtojmë se Gjykata e Sarandës ka vendosur masën e sigurisë “arrest ne burg”. Ata fillimisht u kapën nga policia në vendin e quajtur “Ura e Cukës” duke transportuar dy klandestinë egjiptianë, por më pas gjatë kontrollit të kryer në banesën e tyre, policia gjeti dhe sekuestroi 1 Kallashnikov dhe 35 kg marjuanë.
